Այսօր Ազգային կոմիտեն հայտարարել էր, որ նախօրոք հայտարարված հանրահավաքը հետաձգվում է: Չնայած դրան, քաղաքացիները ինքնաբուխ հավաքվել էին Հանրապետության հրապարակում՝ կառավարության շենքի դիմաց:
Ռազմական, քաղաքական գործիչ Գեւորգ Գեւորգյանը հայտարարեց. «Մենք ի՞նչ ունենք այստեղ իրար հետ կիսելու, հարգելի ոստիկաններ, հայ ժողովուրդ, իրար հետ կիսելու, կիսելո՞ւ բան ունենք, թե՞ պահելու մեր ինքնությունը, մեր պետականությունը, մեր լինելիությունը: Ես պահանջում եմ ու ուզում եմ դուք բոլորդ առաջինը պահանջեք այ սրանից, էս իշխանության ղեկին նստածից: Անցած տարի ինքը Պրահայում ճանաչեց Արցախը Ադրբեջանի կազմում, ճի՞շտ է: Հիմա ես պահանջում եմ, որ Ադրբեջանի կազմում իր ճանաչած Արցախը ինքը հիմա հերքի, ասի՝ չեմ ճանաչում: Մեկ է, ինքը սովոր է այսօր մի բան ասի, վաղը փոխի: Միայն խոսքո՞վ է ճանաչել, թե՞ գողեգող փաստաթուղթ է ստորագրել՝ ժամանակը ցույց կտա: Բայց առաջին խնդիրը դա է, որ ինքը պարտավոր է անել»:
Նա ասաց, որ այսօր Հայաստանը անվտանգային լուրջ խնդիր ունի. «5 պակաս է, որ ագրեսոր Ադրբեջանը պատերազմ սկսի, սահմանը հատի: Ի՞նչ է խանգարելու ագրեսոր թշնամուն անի այն, ինչ այսօր Արցախի հետ է անում»: Նա հորդորեց անմիջապես հայտարարել զորավարժություններ ու պատրաստվել:
Հռիփսիմե ՋԵԲԵՋՅԱՆ
