Ստրասբուրգում ընթացող Եվրոպայի խորհրդի խորհրդարանական վեհաժողովի (ԵԽԽՎ) լիագումար նիստի ընթացքում ԵԽ գլխավոր քարտուղար Մարիա Պեյչինովիչ Բուրիչի հետ հարցուպատասխանի ժամանակ AlDE խմբի ղեկավար Բիանի Յանսոնը (Իսլանդիա) ԵԽ գլխավոր քարտուղարին հարցրեց՝ կարո՞ղ եք այս վեհաժողովին խոստանալ, որ Դուք ամեն ինչ կանեք, ինչը Ձեր կարողություններից է բխում, որ պաշտպանեք Լեռնային Ղարաբաղից վտարված հայերի հիմնարար իրավունքները։
ԵԽ գլխավոր քարտուղարը պատասխանեց․ «Ինչ վերաբերում է Ձեր հարցին՝ կապված հայերի հետ, որոնք փախել են այն տարածքից, որտեղ հարյուրավոր տարիներ ապրում էին, այս պահի դրությամբ իմ հատուկ ներկայացուցիչն արդեն ճանապարհին է դեպի Հայաստան՝ համաձայնեցված ՀՀ իշխանությունների հետ։ Նա կքարտեզագրի այդ մարդկանց կարիքները, քանի որ նրանք հարյուր հազարից ավելի են․ համարյա բոլորը լքել են Ղարաբաղը։ Մենք կմշակենք ծրագիր, թե ինչպես օգնել այդ մարդկանց։ Բայց կարևոր հարց է նաև այն, թե երբ և ինչպես նրանք պետք է վերադառնան իրենց տները, քանի որ կարծում եմ՝ ոչ մեկ չի ուզում լինել փախստական, լքել իր նախնիների հայրենիքը, լքել իր ծննդավայրը։
Ես կարծում եմ՝ ԵԽ-ի շրջանակում պետք է ուշադրություն դարձնենք այս հարցին և ապահովենք, որպեսզի այս մարդիկ վերադառնան իրենց ծննդավայրը։ Հույս ունեմ, որ շուտով կկարողանանք քարտուղարության առաքելությունն ուղարկել Ադրբեջան, որը հասկանա, թե Ադրբեջանի ղեկավարությունն ինչ է մտածում այս իրավիճակի հետ կապված։ Բայց նաև ես կոչ եմ անում Ադրբեջանին իրագործել մարդու իրավունքների եվրոպական կոնվենցիայի դրույթները, քանի որ ԵԽ տարածքում յուրաքանչյուր անձի իրավունքներ պետք է պաշտպանված լինեն»։
Կարդացեք նաև
Տաթև ՀԱՐՈՒԹՅՈՒՆՅԱՆ