Սյունիքի մարզում նախնական հաշվարկներով բնակություն հաստատած բռնի տեղահանված 5257 արցախցիներից 4300-ը գտնվում են ոչ հյուրանոցային կամ հյուրատնային պայմաններում։ Նրանք ապրում են հիմնականում վարձակալությամբ տրված բնակարաններում կամ տարբեր գյուղական բնակավայրերի սեփական տներում։
Կապանի Առաջաձոր գյուղում արցախցի 5 ընտանիք է վերաբնակեցվել։ Նազիկ Պողոսյանի ընտանիքն Ասկերանի շրջանի Վարդաձոր գյուղում էր ապրում։ Հիմա ամուսնու հետ Առաջաձորում է բնակություն հաստատել, իսկ 4 երեխաները մնացել են Գորիսում։ Հողաթափերով է հասել Կոռնիձոր։ «Հարցրին՝ ասին որտեղ ես ուզում մնաս՝ ասացի այնպիսի մի տեղ, որ կարողանամ երկու հավ պահեմ, վարուցանք անեմ»,-նշեց Նազիկ Պողոսյանը։ Երեխաների կարոտը մի փոքր-ինչ կբարդացնի ապրելակերպը, բայց չի նեղվում։ «Մոտիկ է Գորիսը՝ կգնամ՝ կարոտս կառնեմ»,-ասում է տիկին Նազիկը։
Գորիսի Վերիշեն գյուղում բնակություն հաստատած Կոլյա Ավանեսյանի որդին ու հարսը մինչեւ աշխատանք գտնեն, ինքը սեփական փոքրիկ տնտեսությունն է ստեղծել։ Պետության տրամադրած ֆինանսական միջոցներով ու իր խնայած գումարով երկու խոզ է գնել, 10 ճագար։ Հնարավորության դեպքում՝ հավ է պահելու, խոշոր եւ մանր եղջերավոր անասուններ է գնելու։ «Ես չեմ սիրում, որ ասում են՝ փախստական ես։ Տեղս հանգիստ նստեմ՝ սպասե՞մ հումանիտար օգնություններին։ Եթե առողջ ես, պիտի աշխատես՝ ցանես, ուտես»,-համոզված է Կոլյա Ավանեսյանը։
Կարդացեք նաև
Գորիս համայնքի տարբեր բնակավայրերում Արցախից տեղահանված մոտ 500 ընտանիք է ապրում։ Գորիսի համայնքապետարանը քարտեզագրել է համայնքի տարածքում առկա բոլոր ազատ շենք-շինությունները, որպեսզի դրանք փոխվեն բնակարանների։ Առաջին շենքը Գորիս քաղաքում վերակառուցվում է ամերիկահայերի ֆինանսավորմամբ։ Տեղահանման օրերին Լոս Անջելեսում մոտոցիկլավարների հայկական բրիգադը դրամահավաք էր կազմակերպել։
Բրիգադի անդամ Հրաչ Խոզաբեկյանը աճուրդով վաճառել է իրեն պատկանող ձեռագործ հայկական գորգերն ու գումարը տրամադրել բնակարանաշինությանը։ Գորիսի համայնքապետարանը ամերիկահայերին հատկացրել է քաղաքում չգործող պահեստներից մեկի շենքը։ Շինաշխատանքներին անձամբ ամերիկահայ բարերարներն են հետեւում, շինանյութը իրենք են ընտրում եւ գնում, իսկ վերակառուցման աշխատանքները իրականացնում է Գորիսի համայնքապետարանի ենթակայությամբ գործող «Գորիս բարեկարգում» համայնքային ոչ առեւտրային կազմակերպությունը։ «6 ընտանիքի համար է այս պահին նախաձեռնությունը իրականացվում։ Շարունակաբար համայնքային այլ նշանակության շենքեր եւս կվերակառուցվեն, արդեն ունենք նախագծեր, նույնիսկ բնակարանաշինության համար մրցույթներ ենք հայտարարել , որպեսզի գոնե տարեվերջ կարողանանք մի քանի ընտանիքի ապահովվել բնակարանով»,-լրագրողների հետ զրույցում նշեց Գորիսի համայնքի ղեկավարի տեղակալ Իրինա Յոլյանը։
Սյունիքում այս պահին օրակարգային է բռնի տեղահանված արցախցիների զբաղվածության հարցը։ Պետական եւ մասնավոր շատ ընկերություններ աշխատանքի ընդունման հայտարարություններ են տարածել․ միայն Քաջարանի «Աժդահակ» ՍՊ ընկերությունը 50 նոր աշխատեղ է բացել արցախցիների համար եւ նրանց տեղավորել աշխատանքի։
Սյունիքի մարզպետի աշխատակազմից Aravot.am-ին տեղեկացրին, որ պետական կառույցներում եւս կան թափուր աշխատատեղեր, մասնավորապես՝ մանկավարժների, բժիշկների, բուժքույրերի կարիք կա։
Լուսանկարները Գորիսի համայնքապետարանի ֆեյսբուքյան էջից
Արմեն ԴԱՎԹՅԱՆ
