Զինված ուժերի ԳՇ պետի նախկին տեղակալ Տիրան Խաչատրյանն այսօր լրագրողների հետ ճեպազրույցում անդրադարձավ Նիկոլ Փաշինյանի այն հայտարարությանը, որ բանակում ազատվել են «5-րդ շարասյունից»։
«Ըստ էության, ես համարում եմ, որ մենք այսօր բանակում ազատվել ենք 5-րդ շարասյունից»,- ասել էր Նիկոլ Փաշինյանը։
Հարցին, թե ո՞ւմ նկատի ունի Նիկոլ Փաշինյանը, Տիրան Խաչատրյանը պատասխանեց․ «Դա ինքը պետք է ասի, ես չգիտեմ՝ բանակում այդ 5-րդ շարասյունը․․․ Ես այդ 5-րդ շարասյան տեղը մինչեւ օրս էլ չգիտեմ։ Եթե ինքը գիտի, ինչո՞ւ կոնկրետ չի նշում՝ ովքե՞ր են այդ 5-րդ շարասյան պարագլուխները կամ հենց 5-րդ շարասյան կազմում եղողները։ Ուղղակի մերկապարանոց հայտարարություններ են, որոնք անիմաստ փիառի կամ ժողովրդի ուշադրությունը շեղելու նպատակ են հետապնդում»։
Լրագրողները Տիրան Խաչատրյանին նաեւ հարց ուղղեցին այն մասին, թե 2022 թվականի հարձակումից հետո ադրբեջանցիները Ջերմուկի տարածքներից հետ քաշվե՞լ են։ ԶՈւ ԳՇ պետն ասել էր՝ կսովածանան, հետ կքաշվեն։ Խաչատրյանն ասաց, որ թշնամու զորքերը հետ չեն գնացել։ «Դրա մասին բաց աղբյուրներից հրապարակումներ եղել են, թշնամին որտեղ կանգնած եղել է, մինչեւ այսօր էլ ամրացնում է իր դիրքերը՝ ինժեներական ու նաեւ մարտավարական առումով։ Հետագայում ես չեմ բացառում, որ ունենալով ռազմավարական նշանակություն, զորքերը դուրս չեն բերի»,- ասաց նա։
Կարդացեք նաև
Ռոզա ՀՈՎՀԱՆՆԻՍՅԱՆ
Լուսանկարը՝ Նունե Մելքումյանի
