«Առաջարկվում է մի սողանցք, հնարավորություն, որով կարելի է չծառայել, դրանից հետո հայրենիքի առջեւ ունեցած պարտքը փողով գնել»,- ԱԺ արտահերթ նստաշրջանում ՔՊ խմբակցության պատգամավոր Հայկ Սարգսյանի հեղինակած «Զինվորական ծառայության եւ զինծառայողի կարգավիճակի մասին» օրենքում լրացումներ եւ փոփոխություն կատարելու մասին նախագծի քննարկման ժամանակ ասաց «Հայաստան» խմբակցության պատգամավոր Թադեւոս Ավետիսյանը։
Նա նշեց, որ խնդիրը կա, պետք է լուծվի, բայց առաջարկվող լուծումը սկզբունքորեն հակասում է նաեւ մեր երկրի սահմանադրական կարգին։ «Իրականում մենք սոցիալական պետություն ենք սոցիալական արդարության հիմքով։ Չի կարելի ասել, որ՝ եթե անապահով ես, փող չունես, պիտի կամ դատվես, կամ հայրենիքի առաջ պարտքդ կատարես, իսկ եթե ունես փող, խնդրեմ, վճարիր փողը, անցիր առաջ։ Չի կարելի նման ֆունդամենտալ հակասոցիալական քաղաքականությունը բերել օրենքի մակարդակ։ Համաձայն եմ, որ անապահով չի նշանակում ցածր ինտելեկտուալ մակարդակ։ Բա այդ դեպքում ձեր խոսույթն էր, չէ՞, երբ ասում էիք՝ աղքատությունը մարդկանց ուղեղում է։ Եվ սա ասել է ձեր ղեկավարը։ Աղքատությունը մարդու ուղեղի մեջ չէ, աղքատությունը սոցիալ-տնտեսական իրավիճակով է պայմանավորված։ Իսկ այս նախագիծը եւս մեկ անգամ գալիս է ձեր դրած սկզբունքից՝ չունես գումար, հետեւաբար, կամ պիտի դատվես, կամ պարտադիր զինվորական ծառայության գնաս։ Եթե ունես գումար, ապա ազատված ես եւ այս կոմֆորտից կարող ես օգտվել»,- ասաց Թադեւոս Ավետիսյանը։
Ռոզա ՀՈՎՀԱՆՆԻՍՅԱՆ
