Ազգային ժողովն արտահերթ նստաշրջան է հրավիրել, որի օրակարգում նաեւ Հարկային օրենսգրքում փոփոխություններ ու լրացումներ կատարելու նախագիծն է։
Ֆինանսների նախարարի տեղակալ Արման Պողոսյանն ասաց, որ նախագծով բարելավող նորմեր են առաջարկվում գյուղատնտեսության ոլորտում պետական աջակցության ծրագրերի համար եւ առաջարկվում է նախագծի կարգավորումները կիրառել 2023 թվականի հունվարի 1-ից ծագող հարաբերությունների վրա։ «Հետեւաբար, որպեսզի տնտեսվարող սուբյեկտները հունվարի 1-ից կարողանան այս նորմը կիրառել, շատ կարեւոր է, որպեսզի մինչեւ տարեվերջ այս օրենքի նախագիծն ընդունված եւ հրապարակված լինի»,- ասաց Պողոսյանը։
Օրակարգում ներառված մյուս հարցը Հայաստանի Հանրապետության եւ ՕՊԵԿ-ի միջազգային զարգացման հիմնադրամի միջեւ «Կանաչ, դիմակայուն եւ ներառական զարգացման ծրագիր» վարկային համաձայնագիրը վավերացնելու մասին հարցն է։
«Հայաստան» խմբակցության պատգամավոր Արծվիկ Մինասյանն ասաց, որ վարկային համաձայնագրի նախագծում ներկայացված չեն կոնկրետ ծրագրեր, թե ֆինանսավորումն ինչ ուղղությամբ պետք է լինի։ «Եթե մենք 2023 թվականի դեկտեմբերի 12-ին պետք է քննարկենք այդ թվականի բյուջեի դեֆիցիտի ֆինանսավորման աղբյուրը, տվյալ դեպքում՝ վարկային ռեսուրսը, 2023 թվականի բյուջեի նախագծի ներկայացման ժամանակ սա կանխատեսվում էր, չէ՞։ Նշանակում է, ինչ-որ քայլեր պետք է արդեն արված լինեին։ Բայց ստացվում է, որ տարին գալիս ավարտվում է, նոր այդ տարվա բյուջեի պակասուրդի ֆինանսավորման համաձայնագիրն ենք վավերացնում»,- ասաց Արծվիկ Մինասյանը։
Կարդացեք նաև
Արման Պողոսյանն արձագանքեց․ «Հնարավորության դեպքում ցանկալի էր ավելի շուտ, բայց այս դեպքում նույնպես ուշ չէ, որովհետեւ ընթացիկ խնդիրներ չեն գեներացվում»։
Ռոզա ՀՈՎՀԱՆՆԻՍՅԱՆ