Sputnik Արմենիա. Գարեգին Նժդեհի ծննդյան օրը մի խումբ անձինք ցույց են անցկացրել նրա հուշարձանի առջև՝ նացիստական խորհրդանիշներ օգտագործելով: Դրանից հետո Հայաստանում Իսրայելի դեսպան Յոել Լիոնը (նստավայրը՝ Երուսաղեմ) X սոցցանցում գրել էր, որ «նացիստների հանցակից Գարեգին Նժդեհի փառաբանումն անընդունելի է», և որ «իշխանությունները պետք է ամուր դիրքորոշում որդեգրեն նեոնացիզմի և հակասեմականության ցանկացած ձևի դեմ»։
Քանի որ հրապարակային մեկնաբանություն չեղավ, Sputnik Արմենիան հարցում ուղարկեց ԱԳՆ՝ խնդրելով մեկնաբանել Լիոնի հայտարարությունները։ ԱԳՆ-ն լրացուցիչ ժամանակ խնդրեց և պատասխանեց մեկ ամիս անց: Գերատեսչությունից հայտարարել են, որ Հայաստանի Հանրապետությունն անթույլատրելի է համարում անհանդուրժողականության, ազգային կամ կրոնական հիմքով ցանկացած գործողություն, ինչպես նաև վերջինիս որևէ շահարկում` լինի դա քաղաքական, քարոզչական կամ այլ նկատառումներով:
«Միևնույն ժամանակ Հայաստանում հավատարմագրված օտարերկրյա դիվանագետները պետք է ցուցաբերեն հարգալից վերաբերմունք և զերծ մնան արձագանքելուց այնպիսի սադրանքների, որոնք վերաբերելի չեն ընդունող երկրի կառավարությանը կամ ժողովրդին»,-ասված է հաղորդագրության մեջ:
Դավիթ ԳԱԼՍՏՅԱՆ
