Արարատի մարզպետ Սեդրակ Թևոնյանն ընդունել և պարգևներ է հանձնել ազատ ոճի ըմբշամարտի Եվրոպայի չեմպիոն, աշխարհի առաջնության բրոնզե մեդալակիր Վազգեն Թևանյանին, ազատ ոճի ըմբշամարտի Եվրոպայի քառակի չեմպիոն, աշխարհի առաջնության բրոնզե մեդալակիր Արսեն Հարությունյանին, ծանրամարտի մեծահասակների Եվրոպայի առաջնության չեմպիոն, աշխարհի առաջնության բրոնզե մեդալակիր Գոռ Սահակյանին, ազատ ոճի ըմբշամարտի աշխարհի առաջնության բրոնզե մեդալակիր, Եվրոպայի չեմպիոն Արման Անդրեասյանին և վերջիններիս մարզիչներին։
Մարզի ղեկավարը շնորհավորել է մարզիկներին՝ մաղթելով նորանոր հաղթանակներ։
«Դուք ձեր հաղթանակներով մեզ հպարտանալու մեծ առիթներ եք տվել։ Մեր յուրաքանչյուրի գործը հօգուտ Հայաստանի զարգացման է։ Երբեք չսահմանափակվեք ձեռք բերված հաջողություններով, ձեր առջև միշտ բարձր նշաձողեր սահմանեք։ Շնորհակալություն մեր հայրենիքի անունը բարձր պահելու համար», – իր խոսքում ասել է մարզպետ Թևոնյանը։
Վերջիններս ընդգրկվել էին Հայաստանի Հանրապետության 2023 թվականի Տարվա լավագույն մարզիկների տասնյակում։
Արարատի մարզպետի աշխատակազմ
