Մեկ ամսով կալանավորված Արագածոտնի թեմի դիվանապետ Տեր Գարեգին քահանա Արսենյանի պաշտպան Պետրոս Պետրոսյանն արդեն ներկայացրել է վերաքննիչ բողոք պաշտպանյալի խափանման միջոցի վերաբերյալ: Բողոքի քննության օրը դեռ հայտնի չէ: Այս մասին Aravot.am-ին ասաց Պետրոս Պետրոսյանը:
Հիշեցնենք, որ Արագածոտնի թեմի առաջնորդն ու դիվանապետը կալանավորվել են Հովհաննավանքի հոգեւոր հովիվ Տեր Արամ քահանայի հայտարարությունների հիման վրա: Նա Հանրայինի եթերում ասել էր, որ ընդդիմության ցույցերին մասնակցել է չուզելով՝ վերադասի ցուցումով:
Ավելի ուշ լրատվամիջոցների հետ զրույցում Տեր Արամը մանրամասնել էր. «Կոնկրետ ես էդ հրահանգները ստացել եմ դիվանապետից, իսկ դիվանապետը իր լիազորությունները չի կարող չարաշահել: Թեմի դիվանապետը, երբ որ հրահանգները մեզ ուղարկում է, ասում է, որ սա սրբազան հոր կարգադրությունն է»:
Տեր Գարեգին քահանա Արսենյանը մեղադրվում է պաշտոնական դիրքը օգտագործելու եւ հավաքներին հարկադրելու ու օժանդակելու հանցակազմի մեջ:
Կարդացեք նաև
– Ոչ մի ապացույց չկա: Նույնիսկ Տեր Արամի ցուցմունքում չկա հարկադրանքի մասին որեւէ տվյալ: Տեր Արամ քահանայի ցուցմունքում նշվում է ինչ-որ չաթի մասին, որտեղ փոխանցվել են հանձնարարությունները հավաքներին մասնակցելու վերաբերյալ, բայց հարկադրանքի վերաբերյալ որեւէ տվյալ Տեր Արամը չի հայտնում: Ամենաաբսուրդի մասին ասեմ, հանրային հետապնդում հարուցելու մասին որոշումը, որ դատախազը կայացրել է, տարրական իրավաբանությանը չի համապատասխանում: Նույնիսկ նկարագրված չէ հանցագործություն: Այն հոդվածը, որ կարելի էր վերարտադրել, առանց փաստերը շարադրելու, գրել, որ հարկադրանք է տեղի ունեցել, նույնիսկ դա չի արված: Օրենքը հստակ տարանջատում է հարկադրանքի ձեւերը՝ բռնություն գործադրելու, գույք ոչնչացնելու, շանտաժի եղանակով հարկադրելու, դրանցից որեւէ մեկը նկարագրված չէ մեղադրանքում, որ հասկացվի՝ ինչում է մեղադրվում Տեր Գարեգինը,- ասաց պաշտպան Պետրոսյանը:
Բացի մեղադրանք ներկայացնելուց, Տեր Գարեգինի տանը խուզարկություն անելուց ու կալանքի միջնորդությունից Տեր Գարեգինի մասնակցությամբ քննչական այլ գործողություն չի իրականացվել:
-Անհասկանալի էր ՝ինչ էր ման գալիս խուզարկության ժամանակ վարույթ իրականացնող մարմինը, հավաքներին հարկադրելու հանցակազմի տիրույթում, բայց ոչ մի բան չեն գտել:
Այս գործի ամենամեծ աբսուրդն այն է, որ անձը մեղադրվում է մի արարքի համար, որը առնվազն իր նկարագրությամբ հանցագործության հատկանիշներ չի պարունակում: Այն փաստակազմը, որ դրված է մեղադրանքի հիմքում՝ Տեր Արամի ցուցմունքն է, այդ ցուցմունքում առնվազն հարկադրանքի մասին որեւէ նշում չկա: Ընդամենն իր սուբյեկտիվ ընկալումներն են, իր վախերն են, որոնք նույնիսկ հարկադրանքի նմանություն կամ տարրեր իրենց մեջ չեն պարունակում,- ասաց Պետրոսյանը:
Ի դեպ, այս հարցազրույցից հետո Հայ Առաքելական եկեղեցին տարածեց հաղորդագրություն, որ Տեր Արամը կարգալույծ է հռչակվել:
Արփինե ՍԻՄՈՆՅԱՆ
