«Նիկոլը փողոցով եկել է, փողոցով էլ պետք է գնա»,- ՀՀ հակակոռուպցիոն դատարանի մոտ, լրագրողների հետ զրույցում ասաց Երեւանի նախկին քաղաքապետ Ալբերտ Բազեյանը։ Նրա ղեկավարած ուժը սատարում է «Ուժեղ Հայաստանին»։
Ալբերտ Բազեյանի գնահատմամբ, լավագույն տարբերակը կլինի, եթե քաղաքական ուժերը կարողանան մոբիլիզացնել ժողովրդին, ոտքի հանել եւ մինչ գարնան ավարտը համաժողովրդական ընդվզմամբ իշխանափոխություն անել Հայաստանում։
Ինչ վերաբերում է իշխանությունից հնչող այն հայտարարություններին, որ եթե իրենք կրկին բացարձակ իշխանություն չունենան, ապա սեպտեմբերին պատերազմ կլինի, Ալբերտ Բազեյանը հայտարարում է․ «Մենք պատերազմ չենք ուզում»։
Նա նաեւ հավելում է՝ պատերազմ կլինի տարիներ հետո, Արցախը ետ բերելու համար, բայց դա կլինի միայն այն ժամանակ, երբ Հայաստանի դիվանագիտությունն ամուր կլինի, արտաքին քաղաքականությունը պետության շահին միտված կլինի, մեր պետությունը միջազգային համախոհներ կունենա, ինչի արդյունքում նաեւ բանակը կուժեղանա։
Կարդացեք նաև
Մանրամասները՝ տեսանյութում
Դատարանի բակում ի աջակցություն «Ուժեղ Հայաստանի» վարչապետի թեկնածու Սամվել Կարապետյանի ցույցը շարունակվում է։ Իրենց ելույթներում «Ուժեղ Հայաստանի» ներկայացուցիչները հայտարարում են, որ ապրիլի 11-ի՝ «Ուժեղ Հայաստանի» հանրահավաքից հետո իշխանությունն իր վախերն է ցուցադրում՝ «Ուժեղ Հայաստանի» դեմ ռեպրեսիաներ սկսելով։ Նաեւ պնդում են՝ ձերբակալություններից եւ կալանավորումներից իրենք չեն վախենում, այդ ամենի արդյունքում իրենք ավելի ուժեղանում են։
Ամբողջական տեսանյութը՝ այստեղ
Նելլի ԳՐԻԳՈՐՅԱՆ
