Yandex Armenia-ն իր «Օգնենք միասին» բարեգործական նախաձեռնության նոր ռազմավարական ուղղության մասին է հայտարարել․ ծրագրին միացել են կրթական հիմնադրամներ, և Yandex Go-ի միջոցով կատարվող նվիրատվությունները կուղղվեն Հայաստանի մարզերում երեխաների և դեռահասների համար նախատեսված նախագծերին, այդ թվում՝ թվային հմտությունների զարգացմանը և կրթության ներառականության խթանմանը։
Նախաձեռնությանը միացել են երեք կազմակերպություններ՝ Bridge of Hope-ը, Teach for Armenia-ն և «Հայաստանի մանուկներ» հիմնադրամը (COAF)։ Երեք կազմակերպությունները իրականացնում են կրթական նախագծեր Հայաստանի մարզերում, ներառյալ ուսուցիչների պատրաստումը, հաշմանդամություն ունեցող երեխաներին աջակցությունն ու դպրոցներում ենթակառուցվածքների զարգացումը։
Նվիրատվությունները կարելի է ձևակերպել Yandex Go հավելվածի «Օգնենք միասին» բաժնում։ Օգտատերը ընտրում է գումարը, որը ավտոմատ կերպով կավելանա Տաքսի և Առաքում ծառայությունների պատվերների արժեքին։ Ընկերությունն ամեն ամիս նվիրատվություններին իր կողմից ավելացնում է 1,5 մլն դրամ։ Օգտատերը նվիրատվությունները կարող է անջատել ցանկացած պահի։
Նախաձեռնության գործարկման առաջին մեկուկես տարվա ընթացքում օգտատերերը Yandex Go-ում «Օգնենք միասին» ծրագրով կատարել են 580 300 պատվեր։ Yandex Armenia-ի ներդրման հետ միասին նախաձեռնության շնորհիվ բարեգործական հիմնադրամներին է փոխանցվել 60,6 մլն դրամ։ Այս միջոցներն ուղղվել են ծանր հիվանդություններ ունեցող երեխաների բուժմանը, վերականգնողական աջակցությանը և դժվար իրավիճակում հայտնված ընտանիքների օգնությանը։
«Օգնենք միասին» նախաձեռնությունը մեկնարկել է 2024 թվականի հունիսին։ Ավելի վաղ միջոցներն ուղղվում էին Viva, «Շտապիր դեպի բարին», City of Smile և «Հայ մայրեր» հիմնադրամներին։
