Վրաստանի Բաթում քաղաքում շարունակվող ծանրամարտի Եվրոպայի առաջնությունում Հայաստանի հավաքականի այսօրվա միակ ներկայացուցիչը՝ 79 կգ քաշային Մարտին Պողոսյանը, իր նորամուտը մեծահասակների պայքարում նշանավորեց բրոնզե մեդալով։
Նրա մասնակցությունն այս մրցակցությանը հետաքրքիր դասավորվեց։ Պոկում վարժությունում Մարտինը 152 կգ արդյունքով զբաղեցրեց ընդամենը 10-րդ տեղը։ Բայց հայ մարզիկն իրեն առավել քան վստահ էր զգում հրում վարժությունում։
Առաջին իսկ մոտեցմամբ գլխավերևում պահելով 186 կգ-ն՝ նա իր համար ապահովեց առնվազն փոքր արծաթը, որից հետո, ավաղ, երկու անգամ չկարողացավ ֆիքսել 190 կիլոգրամը, ինչը նրան կբերեր ինչպես այս վարժության, այնպես էլ երկամարտի չեմպիոնությունը։
Ինչևէ, առաջին անգամ մասնակցելով Եվրոպայի մեծահասակների առաջնությանը՝ Մարտին Պողոսյանը նվաճեց բրոնզե մեդալը։
Կարդացեք նաև
Աշոտ ՀԱԿՈԲՅԱՆ
