«Սիրանուշ Սահակյանը Ադրբեջանի ՄԻՊ-ին շատ ճիշտ նկարագրեց՝ կախյալ է, բարեկամ է… Ադրբեջան բառը, որ հանեիր, դնեիր Հայաստան, ոչ մի բան չէր փոխվելու նկարագրության մեջ»,- այսպես է Եվրոպական դատարանում գերիների շահերի պաշտպան Սիրանուշ Սահակյանի հայտարարությանը արձագանքում ՀՀԿ փոխնախագահ Արմեն Աշոտյանը:
Աշոտյանի խոսքով՝ ՀՀ-ում ՄԻՊ ինստիտուտն ամենախեղկատակային ինստիտուտներից մեկն է. «Դա ասում եմ՝ տասնյակ մարդկանցից մեկը, որը անցել ու մինչեւ հիմա անցնում է բոլոր գործընթացներով: Մենք չունենք այդպիսի անձնավորություն, որի վրա կարող ենք հույս դնել: Այո, քաղաքականացնում եմ, որովհետեւ մարդու իրավունքների պաշտպանություն երեւույթը քաղաքական երեւույթ է, այն ծնվել է քաղաքական մտքի արդյունքում, քաղաքականության հետեւանք է: Վատ է, որ այսօրվա վիճակում առերեսվում ենք այս իրականությանը»:
Աշոտյանը խոսեց նաեւ ընդդիմության գործիքակազմերից ու նկատեց, որ հիմա ընդդիմությունը չունի այն գործիքակազմը, որն ուներ մինչեւ 2018 թվականը. «Խորհրդարանում ընդդիմության բացառիկ գործիք էր հանդիսանում խորհրդարանական դիվանագիտությունը: Երբ ընդդիմությունը կարողանում էր այդ գործիքով տեսանելի ու հասանելի լինել արտերկրին: Այսօրվա կոնյունկտուրան այնպիսին է , որ ԵԽԽՎ-ում մեր ընդդիմադիր գործիչներին ստիպված են լսում ու ստիպված են հանդիպում, որովհետեւ չեն ուզում լսել ու հանդիպել: Հայաստանի գործող ռեժիմն ամբողջությամբ բավարարում է՝ սպասարկելով այն օրակարգը, որ իրենց պետք է: Ընդդիմության հետ հանդիպումն ավելի շատ պրոտոկոլ է, քան թե իրականում տեղեկատվության փոխանակում: Այսինքն՝ Եվրոպական խորհրդարանական վեհաժողովները դարձել են դանայան մի մեծ տակառ, որտեղ ընդդիմությունը կարող է տոննաներով կոկորդիլոսի արցունքներ լցնել իրավիճակի հետ կապված, բայց այդ տակառները մի կաթիլ նույնիսկ չեն լցվում ու չկա հետադարձ կապ»:
Կարդացեք նաև
Արփինե ՍԻՄՈՆՅԱՆ
Արխիվային լուսանկարը՝ Արմեն Աշոտյանի ֆեյսբուքյան էջից
