ԱԺ պետական-իրավական հարցերի մշտական հանձնաժողովի՝ մայիսի 11-ին գումարմած արտահերթ նիստում երկրորդ ընթերցմամբ քննարկվել եւ դրական եզրակացություն է ստացել ՀՀ ԱԺ պատգամավոր Հայկ Սարգսյանի հեղինակած «Հայաստանի Հանրապետության քրեական օրենսգրքում փոփոխություններ եւ լրացումներ կատարելու մասին» օրենքի նախագծը:
Հիմնական զեկուցող Հայկ Սարգսյանի խոսքով երկրորդ ընթերցման ժամանակահատվածում Կառավարության հետ համաձայնեցվել եւ մի շարք կարեւոր փոփոխություններ են կատարվել, որոնցով առավել խստացվում են թմրամիջոցների ապօրինի շրջանառության համար նախատեսված պատիժները:
«Եթե գործող օրենքով «Տելեգրամ» հարթակի միջոցով թմրամիջոց իրացնելու համար նախատեսված է 3-ից 6 տարվա ազատազրկում, ապա նախագծով այն խստացվում է՝ դառնալով 5-ից 10 տարի: Անչափահասին թմրամիջոց վաճառելու համար գործող օրենքով նախատեսված է 3-ից 6 տարվա ազատազրկում: Նախագծով այն խստացվում է՝ դառնալով 8-ից 15 տարի»,- ընդգծել է զեկուցողը:
Կարդացեք նաև
Օրինագծով առաջարկվում է խստացնել նաեւ թմրամիջոցների աճեցման, արտադրելու, ձեռք բերելու կամ պահելու համար նախատեսված պատիժները: Մասնավորապես, առաջարկվում է տուգանքի առավելագույն չափը 10-ապատիկի փոխարեն սահմանել 20-ապատիկ, այսինքն՝ կրկնապատկել, ազատազրկումը 1 տարվա փոխարեն սահմանել 2 տարի: Խոշոր չափերով կամ տեղեկատվական տեխնոլոգիաների միջոցով ձեռք բերելու դեպքում տուգանքը 10-ապատիկից 30-ապատիկի փոխարեն սահմանել 20-ապատիկից 40-ապատիկ, ազատազրկումը 2 տարվա փոխարեն սահմանել 4 տարի: Առանձնապես խոշոր չափերով ձեռք բերելու կամ անչափահասի նկատմամբ կատարելու դեպքում ազատազրկումը 2-ից 5 տարվա փոխարեն սահմանել 3-ից 6 տարի:
Հիմնական զեկուցողը նշել է, նաեւ որ առաջարկվում է խստացնել նաեւ վարչական պատասխանատվությունը: Առանց իրացնելու նպատակով, մանր չափերով թմրամիջոց արտադրելու, պատրաստելու, ձեռք բերելու կամ պահելու համար տուգանքը 200.000-400.000 դրամի փոխարեն սահմանել 400.000-800.000 դրամ: Նույն արարքը մեկ տարվա ընթացքում կրկին կատարելու դեպքում տուգանքը 400.000-800.000 դրամի փոխարեն սահմանել 800.000-1.600.000 դրամ:
Հարակից զեկուցող, ՀՀ արդարադատության նախարարի տեղակալ Գեւորգ Քոչարյանը նշել է, որ նախագծի շուրջ բավականին երկար աշխատել են հեղինակի հետ եւ ներկայացրել մի շարք առաջարկներ, որոնք ընդունվել են:
ԱԺ
