«Վերջին օրերին, շաբաթներին ՌԴ-ն հայտարարել է, որ փակում է մուտքը ռուսական շուկա հայաստանյան հատապտուղների, մրգերի, բանջարեղենի, Ջերմուկի, ծաղիկների տարբեր արտադրատեսակների արտահանման համար՝ ինձ համար անհասկանալի, ոչ հիմնավոր պատճառներով։ Մենք շատ կառուցողական և գործընկերային մթնոլորտում, աշխատանքային քննարկումներում կհարթենք մեր խնդիրները ՌԴ մեր գործընկերների հետ»,- Գավառում ՔՊ հանրահավաքի ժամանակ վստահեցրեց ՀՀ ԱԳ նախարար Արարատ Միրզոյանը։
Ըստ Արարատ Միրզոյանի՝ այս դրվագը մեզ հնարավորություն տվեց ուսումնասիրել ու նոր կապեր հաստատել և նոր շուկաներ բացահայտել մեր արտահանողների համար․ «Թող քննարկումները գնան, և պայմանագրերը լինեն, վերջնական գործարքները հաստատվեն, կնքվեն, բայց ես հիմա արդեն կարող եմ ասել, որ բազմաթիվ միջազգային գործընկերներ, և չեմ վարանի ասել՝ ԵՄ երկրներից, հյուսիսից հարավ, արաբական երկրներից, Թուրքիայում տարբեր բիզնես գործընկերներ հետաքրքրված են՝ մեր արտահանողների հետ նոր համագործակցություններ ձևավորելով։ Արդեն իսկ ծաղկի խմբաքանակ կա, որ մեկնել է բոլորովին նոր շուկա և այնտեղ սպառվում է»։
Արարատ Միրզոյանը ժողովրդին վստահեցրեց՝ որևէ հարցում կառավարությունը ձեզ խնդրի առաջ մենակ չի թողնելու։ Մենք կլուծենք ձեր հարցերը։ Ու հիշեց, որ մի արտահանող մոտեցել է իրեն և ասել՝ մենք մեր անկախությունը ելակի դիմաց չենք զիջելու։ Այնուհետև, վանկարկելով, կրկնեց այդ խոսքերը․ «Մենք մեր անկախությունը ելակի դիմաց չենք զիջելու»։
Կարդացեք նաև
Գավառում ՔՊ հանրահավաքն ամբողջությամբ՝ տեսանյութում
Տաթև ՀԱՐՈՒԹՅՈՒՆՅԱՆ
