«Քաղաքացիական պայմանագիր» կուսակցությունը վարչության նիստ է գումարել, որի ընթացքում ընտրելու են նաև ԱԺ փոխնախագահի թեկնածուներ։
Թեկնածուն ընտրվելու է փակ գաղտնի քվեարկությամբ։ ԱԺ փոխխոսնակի պաշտոնի համար իրենց թեկնածությունն են առաջադրել ՔՊ-ականներ Հայկ Կոնջորյանը, Վահագն Ալեքսանյանը, Արման Եղոյանը, Արուսյակ Ջուլհակյանը և Ալխաս Ղազարյանը։
Նիստից առաջ լրագրողների հետ ճեպազրույցում Արուսյակ Ջուլհակյանն ասաց, որ իր շանսերը գնահատում է նորմալ։ «Կարծում եմ՝ ունեմ շանսեր, բայց վարչությունը կորոշի»,- ասաց նա։ Ջուլհակյանը նշեց, որ ենթադրում է՝ թեժ ընտրություն է սպասվում, որովհետև «բոլոր թեկնածուները շատ արժանավոր քաղաքական գործիչներ են»։
Անդրադառնալով ՍԴ նիստում իր հասցեին հնչած մեկնաբանություններին՝ Արուսյակ Ջուլհակյանն ասաց․ «Մերկապարանոց մեղադրանքներ են»։
Կարդացեք նաև
Հարցին, թե մտավախություն չունի՞, որ ՍԴ-ն անվավեր կճանաչի ընտրության արդյունքները, այնինչ ՔՊ-ն արդեն պաշտոններ է բաժանում, Արուսյակ Ջուլհակյանը պատասխանեց․ «Ես նման հեռանկար չեմ տեսնում, որովհետև այն ենթադրյալ խախտումները, որոնք, ըստ ընդդիմադիրների, իբր եղել են և կրել են զանգվածային բնույթ, որևէ կերպ իրականությանը չեն համապատասխանում։ Նույնիսկ եթե եղել են սակավաթիվ առանձին դեպքերով որևէ խախտումներ, ապա դրանք որևէ կերպ չէին կարող ազդել ընտրությունների արդյունքների վրա։ Ես որևէ հեռանկար չեմ տեսնում, որ ՍԴ-ն կարող է անվավեր ճանաչել»։
Արուսյակ Ջուլհակյանի խոսքով՝ այն փաստարկները, որոնք ներկայացվում են նիստի ժամանակ ընդդիմադիր գործիչների կողմից, որևէ կերպ չեն կարող հանգեցնել ընտրությունների անվավեր ճանաչմանը։
Ռոզա ՀՈՎՀԱՆՆԻՍՅԱՆ
