«Դիմողների կողմից, բացառությամբ մեկի, ներկայացված փաստարկները առավել քան համոզիչ են»,- այսօր լրագրողների հետ զրույցում ասաց ընտրությունները Սահմանադրական դատարանում վիճարկելու վերաբերյալ դիմում ներկայացրած 7 քաղաքական ուժերից «Ուժեղ Հայաստանի» ներկայացուցիչ Արամ Վարդևանյանը։
Հիշեցնենք, որ այսօր 6-րդ օրն է, ինչ Սահմանադրական դատարանը քննում է հունիսի 7-ի խորհրդարանական ընտրությունների արդյունքները վիճարկող քաղաքական 7 ուժերի կողմից ներկայացված դիմումը։
Նրա խոսքով՝ այդքան խոսվեց այն մասին, թե, իբր, ընտրախախտումներ են տեղի ունեցել ընդդիմության կողմից, ինչը, նրա գնահատմամբ, ինքնին աբսուրդային պնդում էր։ Սակայն, ինչպես նշեց նա, որևէ մեկը չպնդեց, որ այդ, իբր, խախտումները էական ազդեցություն են ունեցել ընտրությունների արդյունքների վրա։
Կարդացեք նաև
«Հարցուպատասխաններից մեկի ժամանակ ես ուղիղ հարցրի երրորդ անձին՝ եկեք գնանք նոր ընտրությունների կամ թող լինի երկրորդ փուլ։ Եթե իրենք հավատում են իրենց իսկ ներկայացրած, այսպես կոչված, ընտրակաշառքների մասին պատմություններին, ապա պետք է այդ դիրքորոշումը ներկայացնեին։ Հակառակը՝ ամեն կերպ նահանջեցին»,- ասաց Վարդևանյանը։
Անդրադառնալով Սահմանադրական դատարանի դատավորների լեգիտիմության հարցին՝ նա նշեց, որ եթե նույնիսկ մեկ դատավոր ունի լեգիտիմության խնդիր, ապա դա ամբողջությամբ ստվերում է դատարանի ամբողջ կազմը:
Արփինե ՍԻՄՈՆՅԱՆ
