Բուլղարիայում Հայաստանի դեսպան Ծովինար Համբարձումյանը հանդիպում է ունեցել Վառնա քաղաքի տնտեսական և ֆինանսական հարցերով փոխքաղաքապետ Սնեժանա Ապոստոլովայի հետ։ Հանդիպման ընթացքում քննարկվել են հայ-բուլղարական առևտրատնտեսական համագործակցության ընդլայնման հնարավորությունները՝ Հայաստանի համար արտահանման շուկաների դիվերսիֆիկացման համատեքստում, ինչպես նաև զբոսաշրջային փոխանակումների խթանման հարցեր։
Փոխքաղաքապետ Սնեժանա Ապոստոլովան նշել է, որ Վառնան բարենպաստ պայմաններ է առաջարկում բիզնեսի և առևտրային հարաբերությունների զարգացման համար, այդ թվում՝ քաղաքում նոր տնտեսական գոտու ստեղծման ծրագրի շրջանակում։ Նա ընդգծել է, որ Վառնան տարվա բոլոր եղանակներին պահանջված զբոսաշրջային ուղղություն է՝ ծովային և առողջարանային զբոսաշրջությամբ, ինչը էապես մեծացնում է ապրանքների և ծառայությունների պահանջարկը, այդ թվում՝ գյուղատնտեսական։
Հանդիպման ընթացքում անդրադարձ է կատարվել նաև Երևանի և Վառնայի միջև ցամաքային և օդային տրանսպորտային կապերի զարգացման հեռանկարներին։
Դեսպան Համբարձումյանն ընդգծել է նաև Վառնա–Բաթումի լաստանավային կապի կարևորությունը՝ որպես Հայաստանից գյուղատնտեսական արտադրանքի արտահանման կարևոր ուղի։ Դեսպանն ավելացրել է, որ հուլիսի 7-ին մեկնարկել է Բուրգաս–Երևան երթուղով անդրանիկ սեզոնային չվերթը։
Կարդացեք նաև
Կողմերը բարձր են գնահատել հայ-բուլղարական ավանդաբար բարեկամական հարաբերությունները և ընդգծել դրանց հետագա զարգացման հեռանկարները՝ երկու երկրների միջև 2026 թվականի մայիսին ստորագրված ռազմավարական գործընկերության մասին հռչակագրի համատեքստում, որն ընդգրկում է այնպիսի առաջնահերթ ոլորտներ, ինչպիսիք են տնտեսությունը, կրթությունը, մշակույթը, զբոսաշրջությունը և այլն։
Բուլղարիայում ՀՀ դեսպանություն
