«Լուսավոր Հայաստան» կուսակցության նախագահ, ՀՀ հատուկ հանձնարարություններով նախկին դեսպան Էդմոն Մարուքյանի տելեգրամյան գրառումը
Գագիկ Ծառուկյանի գործով իրականացված գործողությունները չեն համապատասխանում քրեական արդարադատության սկզբունքներին։ Տանը խուզարկության ընթացքում ուժի ցուցադրումն ու այդ կադրերի հրապարակումը պարզապես քաղաքական շոուի տպավորություն են ստեղծում։
Ծառուկյանի գործը ընտրովի արդարադատության հերթական օրինակն է։ Երբ իշխանությանը ձեռնտու է, նույն մարդիկ ներկայացվում են որպես խոշոր սեփականատերեր, իսկ երբ այլևս ձեռնտու չէ՝ կրկին դառնում են «օլիգարխներ»։
2018 թվականից հետո այդպես էլ չհաջողվեց իրականում տարանջատել բիզնեսն ու քաղաքականությունը։ Քաղաքականությամբ չպետք է զբաղվեն ոչ օլիգարխները, ոչ էլ խոշոր սեփականատերերը, այլ համապատասխան գիտելիք, փորձ և պատրաստվածություն ունեցող գործիչները։ Երկրի ճակատագիրը չի կարող կախված լինել այն մարդկանցից, որոնց համար քաղաքականությունը սեփական տնտեսական շահերի սպասարկման միջոց է։
Կարդացեք նաև
Այսօր Հայաստանում քաղաքական գործունեությունը խիստ աղավաղված է։ Քաղաքական ուժերը հաճախ նույնիսկ չեն կարողանում պաշտպանել սեփական քաղաքական դիրքերը, ինչն էլ հնարավորություն է տալիս իշխանությանը շարունակել ընտրովի արդարադատության քաղաքականությունը։
«Լուսավոր Հայաստանը» սկզբունքային դիրքորոշում է ունեցել նաև նախկինում․ 2020 թվականին մեր խմբակցությունը դեմ է քվեարկել Գագիկ Ծառուկյանին պատգամավորական անձեռնմխելիությունից զրկելուն (17.06.2020 թ. ԱԺ նիստում իմ ելույթի հղումը), քանի որ այն ժամանակ նույնպես համարել ենք, որ իրականացվում է ընտրովի արդարադատություն։
Վերջին տարիներին Հայաստանում այդպես էլ չեն ձևավորվել անկախ պետական ինստիտուտներ։ Փոխարենը պահպանվել է քաղաքական հրահանգներով աշխատող համակարգը…
