Սուրբ Ղևոնդյանց մայր տաճարի Զորայան թանգարանում տեղի ունեցավ Կալիֆորնիայի 35-րդ նահանգապետ Ջորջ Դոքմեջյանի կյանքին, պետական ծառայությանը և քաղաքական ժառանգությանը նվիրված երեկո։ Միջոցառումն անցկացվեց Հայ Առաքելական Եկեղեցու Հյուսիսային Ամերիկայի Արևմտյան թեմի առաջնորդ Հովնան արքեպիսկոպոս Տերտերյանի հովանու ներքո։
Երեկոյին մասնակցեցին դատավորներ, ներկա և նախկին պետական պաշտոնյաներ, բարերարներ, ակադեմիական, քաղաքական և համայնքային գործիչներ։ Ջորջ Դոքմեջյանի այրին՝ Գլորիա Դոքմեջյանը, ներկա էր դուստրերի՝ Լեսլիի և Անդրեայի հետ։ Ծրագիրը վարեց Գրեգ Քահվեջյանը, որը շուրջ մեկ տասնամյակ ներգրավված է եղել Դոքմեջյանի ընտրարշավներում, երդմնակալության հանձնախմբերում և նահանգապետական գործունեությանն առնչվող աշխատանքներում։
Կարդացեք նաև
Զորայան թանգարանում ներկայացված ցուցադրությունը ներառում էր պատմական լուսանկարներ, տեսագրություններ, արխիվային փաստաթղթեր և հուշառարկաներ։ Նյութերը ներկայացնում էին Դոքմեջյանի ճանապարհը՝ Նյու Յորքի հայ ներգաղթյալների ընտանիքից մինչև Կալիֆորնիայի օրենսդիր մարմին, գլխավոր դատախազի պաշտոն և նահանգապետարան։ Առանձին բաժիններ անդրադառնում էին նրա բյուջետային քաղաքականությանը, կրթության ֆինանսավորմանը, դատական նշանակումներին, հանրային անվտանգության ոլորտին և հայ-ամերիկյան համայնքի քաղաքական ներկայացվածությանը։
Երեկոյի գլխավոր հայտարարությունը Ջորջ Դոքմեջյանի անվան կրթաթոշակային հիմնադրամի ստեղծումն էր։ Հիմնադրամի նպատակը ներկայացրեց «Հայաստան» հիմնադրամի ատենապետ Մարիա Մեհրանյանը։ Նոր նախաձեռնությունը նախատեսված է Կալիֆորնիայի այն ուսանողների համար, որոնք իրենց կրթական և մասնագիտական ուղին կապում են իրավունքի, հանրային քաղաքականության, համայնքային առաջնորդության և քաղաքացիական մասնակցության ոլորտների հետ։ Նախատեսվում է տրամադրել կրթաթոշակներ, մասնագիտական ուղղորդում և առաջնորդական հմտությունների զարգացման հնարավորություններ։
Հիմնադրամի նպատակն է Դոքմեջյանի հանրային ծառայության փորձը վերածել երիտասարդ մասնագետների համար գործնական հնարավորության՝ աջակցելով նրանց կրթությանը, մասնագիտական կայացմանը և պետական ու համայնքային կառույցներում ներգրավմանը։ Նախաձեռնությունը հատկապես կարևորում է հանրային ծառայության սկզբնական փուլերը, երբ ուսանողներն ու երիտասարդ մասնագետները հաճախ առավել մեծ կարիք ունեն ֆինանսական և մասնագիտական աջակցության։
Ջորջ Դոքմեջյանը (1928–2018) ծնվել է Նյու Յորք նահանգի Մենանդս քաղաքում՝ հայ ներգաղթյալների ընտանիքում։ Իրավաբանական կրթություն ստանալուց և ԱՄՆ բանակի իրավաբանական ծառայությունում ծառայելուց հետո նա տեղափոխվել է Կալիֆորնիա և հաստատվել Լոնգ Բիչում։ 1962 թվականին ընտրվել է Կալիֆորնիայի նահանգային ժողովի, 1966 թվականին՝ նահանգային Սենատի անդամ, իսկ 1978 թվականին՝ Կալիֆորնիայի գլխավոր դատախազ։
1982 թվականին Դոքմեջյանն ընտրվել է Կալիֆորնիայի 35-րդ և առաջին հայ-ամերիկացի նահանգապետը, իսկ 1986 թվականին՝ վերընտրվել երկրորդ ժամկետով։ Նրա պաշտոնավարման տարիները կապվում են հարկաբյուջետային կարգապահության, կրթության ֆինանսավորման, հանրային անվտանգության և դատական նշանակումների հետ։ Պաշտոնից հեռանալուց հետո նա վերադարձել է իրավաբանական գործունեության և մինչև կյանքի վերջ մնացել է Կալիֆորնիայի հանրային ու հայ-ամերիկյան պատմության նշանակալի դեմքերից մեկը։
Երեկոյի ընդհանուր կառուցվածքում արտահայտվում էր նաև այն երկարաժամկետ մոտեցումը, որը Հովնան արքեպիսկոպոս Տերտերյանի առաջնորդությամբ ձևավորվել է Արևմտյան թեմում․ հայ ժողովրդի և հայ-ամերիկյան համայնքի հիշողությունն այստեղ չի մնում միայն արխիվում կամ հանդիսավոր խոսքում, այլ շարունակություն է ստանում թանգարանում, կրթական, մշակութային և հանրային նախաձեռնությունների միջոցով։
Հայ-Ամերիկյան տեղեկատվական կենտրոն (AAIC)
