«Աշխարհում չկա գոնե մեկ երկիր, որտեղ պոպուլիստին փոխարինեն ավելի մեծ պոպուլիստները, ես այդպիսի դեպք, ճիշտն ասած, չեմ հիշում վերջին շրջանում: Եթե նայում ենք՝ Եվրոպայում ինչ է տեղի ունենում, պոպուլիստներին փոխարինում են կամ ծայրահեղ աջականները, կամ պահպանողականները, կամ երբեմն սոցիալիստները՝ կախված երկրի սպեցիֆիկայից: Իսկ մեզանում սոցիալիստները և պահպանողականները քաղաքական դաշտում կան և ունեն դերակատարում»,- «Հայկական օրակարգ» նախագծի շրջանակներում կայացած «Որտե՞ղ է ձևավորվում իրական օրակարգը» թեմայով պանելային քննարկման ժամանակ նշեց ՀՀԿ գործադիր մարմնի անդամ Հայկ Մամիջանյանը:
«Մեր տարածաշրջանին առնչվող ամենակարևոր հարցը, այսպես կոչված, կարևորագույն օրակարգային խնդիրը լոգիստիկ նոր ուղիներն են, բայց ոչ այն ձևակերպմամբ և փաթեթավորմամբ, որով ներկայացնում է Փաշինյանը: Մենք չենք կարող խուսափել նոր տրանսպորտային ուղիներ ձևավորելուց, որովհետև դա տեղի է ունենում Հայաստանից անկախ: Եթե ինչ-որ մեկին երկրագնդի վրա թվում է, որ TRIPP նախագիծը Հայաստանով պայմանավորված ծրագիր է, խորհուրդ կտամ մի քիչ ավելի շատ քաղաքագիտություն ուսումնասիրել: TRIPP նախագիծը ինքնին, իմ ընկալման մեջ (ես կարող եմ սխալվել), Միջին Ասիան կամ Կենտրոնական Ասիան որպես ռեսուրսային կարևորագույն ստրատեգիական տարածաշրջան, Ռուսաստանի և Չինաստանի հետաքրքրությունների և ազդեցությունների շրջանից դուրս բերելն է…»,- ի թիվս այլնի նշեց Մամիջանյանը:
Նա հայաստանյան ներքաղաքական օրակարգն անվանեց «երկու հանրաքվեների օրակարգ, դա ԵՄ հանրաքվեն է և Ռուսաստանի Դաշնության կողմից առաջարկվող ԵԱՏՄ-ի հանրաքվեն. «Հայաստանի ամբողջ քաղաքական դաշտը քննարկում է երկու հանրաքվեի թեմա, որոնցից երկուսն էլ ստեղծվել, գեներացվել են Հայաստանից դուրս: Դա չի կարող նորմալ համարվել: Չկա երկիր, որտեղ երկու հիմնական, ամենակարևոր քննարկվող հարցերը արտաքին ծագում ունենան․ դա նորմալ չէ, «միստր Սուվերեն 2026»-ն է Փաշինյանի սուվերենությունը: Եթե մի մակարդակ էլ իջնենք, արդեն գանք ներքաղաքական խնդիրներին և օրակարգերին, ապա այո, ցավոք սրտի, օրակարգը հիմնականում ստեղծվում է Փաշինյանի կողմից»:
Մանրամասն՝ տեսանյութում
Կարդացեք նաև
Պանելային քննարկումն ամբողջությամբ
Գոհար ՀԱԿՈԲՅԱՆ
