Հոկտեմբերի 13-ին Ֆրանսիայում ՀՀ դեսպան, Ֆրանկոֆոնիայի մշտական խորհրդում ՀՀ վարչապետի անձնական ներկայացուցիչ Արման Խաչատրյանը մասնակցել և ելույթով հանդես է եկել Ֆրանկոֆոնիայի մշտական խորհրդի 134-րդ նիստին։
Դեսպան Խաչատրյանը գործընկերներին է ներկայացրել Հայաստանում առաջիկայում մեկնարկող «Կենսաբազմազանության մասին կոնվենցիայի» Կողմերի 17-րդ համաժողովի (COP 17) և դրան նախորդող «Առաջնորդներ՝ հանուն բնության» գագաթնաժողովի նպատակները և ակնկալվող արդյունքները՝ վերահաստատելով Հայաստանի շարունակական հանձնառությունը կենսաբանական բազմազանության պահպանմանն ուղղված միջազգային ջանքերին։
Դեսպանը անդրադարձել է նաև 2027թ․ Հայաստանում անցկացվելիք Ֆրանկոֆոնիայի 10-րդ մարզամշակութային խաղերի, ինչպես նաև դրանց նախօրեին նախատեսվող Ֆրանկոֆոնիայի մշակույթների նախարարների համաժողովի նախապատրաստական աշխատանքներին։
Որպես ՖՄԿ անդամակցության և կարգավիճակի փոփոխության հայտերի կոմիտեի փոխնախագահ՝ Արման Խաչատրյանը Ֆրանկոֆոնիայի մշտական խորհրդին է ներկայացրել Կոմիտեի գործունեության և կատարված աշխատանքների մասին զեկույցը։
