Երևանի ընդհանուր իրավասության քրեական դատարանում` դատավոր Կարեն Ֆարխոյանի նախագահությամբ, այսօր տեղի ունեցավ Բագրատ արքեպիսկոպոս Գալստանյանի և մյուս 17 արդարների գործով դատավարությունը։
Դատավարության ընթացքում՝ ժամեր շարունակ, ցուցադրվեց որպես ապացույց ներառված տեսանյութ՝ PARA TV-ի ղեկավար Էլիզաբեթ Պետրոսյանի բնակության վայրի խուզարկության ժամանակ զենքի զննության դրվագներ պարունակող։ Հայտնաբերվել են որսորդական զենքեր, փամփուշտներ, որոնց համար եղել է նրա ամուսնու՝ Սյունիքի նախկին մարզպետ Վահե Հակոբյանի անունով թույլտվություն։ Նրանցից որևէ մեկն այս գործով մեղադրյալի կարգավիճակ չունի։
Փաստաբաններից մեկն ասաց․ «Հայտնաբերված զենք-զինամթերքը կապ չունի իմ պաշտպանյալի ու մյուսների հետ, այն ի՞նչ ապացույց կարող է լինել վերդիկտ կայացնելու համար»։
Պաշտպանական կողմի մեկ այլ ներկայացուցիչ էլ տեղեկացրեց, որ Վերաքննիչ դատարանի որոշմամբ՝ այն խուզարկությունը, որի արդյունքում ձեռք են բերվել այս ապացույցները, ճանաչվել է ոչ իրավաչափ։ Հետևաբար, ըստ պաշտպանի, դրանք Քրեական դատավարության օրենսգրքի համաձայն անթույլատրելի ապացույցներ են, և դրանց ուսումնասիրությունը ժամանակի անիմաստ կորուստ է։
Կարդացեք նաև
Լազերային սկավառակներից մեկը պարունակությունն էլ չկարողացան զննել, փաստաբաններից մեկն ասաց՝ եթե այն խոտան է, ուրեմն առհասարակ չպիտի դիտարկվի ապացույց։
«Դատաքննությունը հումորային երեկո չէ»,- հակադարձեց դատավորը՝ նշելով, որ մասնագետ կհրավիրեն, որը կօգնի ցուցադրելու այն։
Դատական նիստը հետաձգվեց նոյեմբերի 5-ին՝ 14․30-ին։
Նունե ԱՐԵՎՇԱՏՅԱՆ
