Այսօր ՀՀԿ ԳՄ նիստից առաջ վարչապետ Հովիկ Աբրահամյանը լրագրողների հետ զրույցում այն նկատառմանը, թե կան գազալցակայաններ, որտեղ գազի գինը դեռեւս 230 դրամ է, ասաց, որ հնարավոր չէ նման բան լինի. «Ես բոլոր տեղերը ուղարկել եմ, ստուգել են, ամենաբարձր գինը 210 դրամ է, որեւէ տեղ չկա 230 դրամով գազ»։
Անդրադառնալով գնաճին, վարչապետը իր խոսքում նշեց, որ Տնտեսական մրցակցության պետական պաշտպանության հանձնաժողովը հետեւում է գնային տատանումներին եւ «եթե եղան թանկացումներ՝ բոլորը պիտի պատասխան տան»։
Նկատառումը, թե շատերի համար երեկ վարչապետի՝ սուպերմարկետ շրջայցը փիառ քայլ էր, նա չմեկնաբանեց։
Կառավարության աշխատակազմի ղեկավար Դավիթ Հարությունյանն էլ լրագրողների հետ զրույցում նշեց, որ ինքը նույնպես մտահոգ է գների բարձրացմամբ։ Նրա խոսքով՝ գները կարգավորում է շուկան, իսկ իշխանությունների խնդիրն է վերահսկել դրանք։
Կարդացեք նաև
Հարցին, թե ինչ անի հասարակ քաղաքացին նման բարձր գների պարագայում, եւ ով է փոխհատուցելու, պրն Հարությունյանը ասաց. «Կարող են չարաշահումներ լինել, իհարկե, իսկ պետությունն ունի գործիքակազմ, որով կկարգավորի դրանք։ Սակայն դա չի նշանակում, որ պետք է գալ եւ ասել պետությանը, թե ով է փոխհատուցելու»։
Էլյա ՀՈՎՀԱՆՆԻՍՅԱՆ
Տեսանյութը՝ a1plusnews-ի
