«Կրթությունն այն բնագավառն է, որտեղ կտրուկ փոփոխություններ, վայրէջքներ եւ վերելքներ չեն լինում»,-Aravot.am-ի հետ զրույցում ասաց ՀՀ ԿԳՆ Լեզվի պետական տեսչության պետ Սերգո Երիցյանը` արձագանքելով հարցին, թե ինչ ակնկալիքներ ունի նորանշանակ նախարար Լեւոն Մկրտչյանի պաշտոնավարումից:
Երիցյանը վկայակոչեց վարչապետի դիտարկումը, որ նոր նախարարի` նշանակմամբ կրթության ոլորտում կտրուկ փոփոխություններ չեն լինելու:
«Այսօր մենք աշխատում ենք եւ շարունակելու ենք աշխատել նախապես հաստատված ծրագրերով, հետեւաբար, չեմ կարծում, որ կտրուկ փոփոխություններ կարող են լինել: Իհարկե, յուրաքանչյուր նոր նախարար բերում է իր մոտեցումները, աշխատանքի ոճը, ինչը հասկանալի է»,-ասաց մեր զրուցակիցը:
Սերգո Երիցյանի խոսքով` ներկայում կրթության ոլորտին առնչվող մի շարք օրենքներում փոփոխություններ եւ լրացումներ կատարելու անհրաժեշտություն կա. «Դրանք պետք է համապատասխանեցվեն նոր Սահմանադրությանը եւ ժամանակի պահանջներին: Հուսամ` նախարարության օրակարգում այս խնդիրն է հրատապ: Նաեւ լեզվի պաշտպանության մարմին ստեղծելու անհրաժեշտություն կա: Լեզուն պետք է ոչ միայն վերահսկել, այլեւ պաշտպանել, որովհետեւ այն ինքնազարգացող երեւույթ է»:
Կարդացեք նաև
Լուիզա ՍՈՒՔԻԱՍՅԱՆ
