Հարցազրույց ՀՀԿ խորհրդարանական խմբակցության անդամ ԿԱՐԵՆ ԲԵՔԱՐՅԱՆԻ հետ
-Հայաստանը մշտապես եղել է բանակցային գործընթացի կողմնակից։ Ստացվել է այնպես, որ համանախագահները հիմնականում զբաղվել են Ադրբեջանի քաղաքական կապրիզները «մեղմելով»՝ նրան բերելու բանակցային սեղանի մոտ: Բայց հիմա՝ քառօրյա պատերազմից հետո, Հայաստանը, կոշտացնելով իր դիրքորոշումը, հստակ հայտարարում է՝ երբ գնում են մարտական գործողություններ, երբ Ադրբեջանը խախտում է 1994թ. զինադադարի պայմանները, բանակցությունների վերսկսման մասին խոսելն անհնար է: Ինչպե՞ս կլուծվի այս փակուղին:
-Չկա այնպիսի իրավիճակ, որ հակամարտությանը չհաջորդեն բանակցությունները՝ թե՛ գլոբալ, թե՛ լոկալ մակարդակով: Սա հայտնի ճշմարտություն է: Բայց կա հարցի մյուս կողմը. ե՞րբ սկսել այդ բանակցությունները, որպեսզի դրանք լինեն արդյունավետ, ե՞րբ սկսել, որպեսզի հնարավոր լինի դրանք առաջ մղել:
Առաջին կարեւոր հանգամանքն այն է, ինչի մասին հայտարարում է հայկական կողմը՝ նստել, բանակցել, երբ հնչում են կրակոցներ ու արյուն է թափվում՝ հնարավոր չէ: Ավելին՝ դա կլինի անհասկանալի, անբնական մի բան: Հետեւաբար հայկական կողմը դնում է շատ հստակ ու անհրաժեշտ պայման. որպեսզի բանակցությունները ե՛ւ տեղի ունենան, ե՛ւ լինեն արդյունավետ, Ադրբեջանը պետք է հարգի զինադադարը:
Կարդացեք նաև
Կա նաեւ երկրորդ բաղադրիչը. որպեսզի բանակցությունները լինեն արդյունավետ, պետք է լինի փոխադարձ վստահություն:
Ես ուզում եմ մի կարեւոր բան շեշտել. երբ ասում ենք, որ այս պահին նպատակահարմար չէ բանակցությունների վերսկսումը, թող սխալ չընկալվի, թե ասում ենք՝ այլեւս բանակցություններ չեն լինելու, թե խնդիրը բանակցային դաշտում այլեւս չի քննարկվելու: Հարցը հետեւյալն է. կրկնում եմ, եթե սահմանին արյուն է թափվում, բանակցությունների սեղանի շուրջ ինչի՞ մասին կարող են բանակցել:
Ինչ վերաբերում է փակուղուն, ապա այդ մասին Հայաստանի ու Արցախի հանրապետությունները մեկ անգամ չէ, որ զգուշացրել են ու ահազանգել միջազգային հանրությանը, այդ թվում՝ Մինսկի խմբի համանախագահներին: Վերջը եկավ ու հասավ քառօրյա պատերազմին: Պետք է լինի կայուն զինադադար, պետք է վերացվեն ուժի եւ ուժի սպառնալիքի բոլոր դրսեւորումները։ Սա այն է, ինչի մասին նշվում է որպես երրորդ քայլ: Այսինքն՝ անվտանգության երաշխիքներ ասվածը նշանակում է ուժի եւ ուժի սպառնալիքի վերացում:
Ա.ՍԻՄՈՆՅԱՆ
Հարցազրույցն ամբողջությամբ՝ «Հայոց աշխարհ» թերթի այսօրվա համարում
