Արթուր Սաքունցի կարծիքով, «Ընտրությունների ժամանակ ոստիկանության գործողությունների ուղեցույցի» նախագծում պահակակետի գործառույթները շատ լավ ներկայացված են՝ ինչ պետք է անի, բայց մնացած խմբերի անելիքները նշված չեն:
«Նշված չէ՝ օպերատիվ խումբը օրինակ պետք է հետեւի ընտրության օրը նախընտրական շտաբերի գործառույթներին, ինչ է անում նախընտրական շտաբը ընտրությունների օրը: Մենք հիմնավոր կասկածներ ունենք պնդելու, որ նախընտրական շտաբերը ղեկավարում են քաղաքացիների ուղղորդված հոսքը դեպի ընտրատեղամաս, հիմնավոր ահազանգեր կան, որ որոշակիորեն գործում են շահագրգռելու մեթոդներն ու խրախուսանքները՝ ընտրակաշառքի ձեւով: Ես գտնում եմ, որ ոստիկանության հիմնական թիրախը՝ օպերատիվ խմբերի մասով, պետք է լինի նախընտրական շտաբերի գործառույթների հսկողությունը»,- այսօր ոստիկանությունում ուղեցույցի նախագծի վերաբերյալ հանրային քննարկման ժամանակ ասաց իրավապաշտպան Արթուր Սաքունցը:
Նա ընդգծեց, որ ընտրությունների նախորդ օրը՝ լռության օրը նույնպես ոստիկանությունը պետք է աշխատի, որովհետեւ ըստ նրա. «Լռության օրը շարունակվում են ստվերային գործողությունները»:
«Իրազեկ քաղաքացիների միավորում» հ/կ համակարգող Դանիել Իոաննիսյանն էլ ասաց, որ թե՛ նախընտրական քարոզարշավի, թե՛ քվեարկության օրը, փորձելու են բացահայտել ընտրակաշառքի բաժանման եւ վարչական ռեսուրսների օգտագործման դեպքերը. «Մեր բացահայտումներն, անշուշտ, ներկայացնելու ենք իրավապահներին, բայց ես չէի ցանկանա, որ մենք բացահայտեինք ավելի շատ ու հիմնավոր, քան դա կաներ ոստիկանությունը: Ուզում եմ, որ Հայաստանի ոստիկանները, որոնք ավելի շառ ռեսուրսներ ունեն, քան մենք, ավելի շատ դեպքեր բացահայտեն, քան մենք: Որովհետեւ նախկինում դիտորդներն ավելի շատ հանցագործություններ են բացահայտել, քան ոստիկանությունը: Ուզում եմ, որ այդ միտումը չշարունակվի»:
Կարդացեք նաև
Ոստիկանության շտաբի պետ Հովհաննես Քոչարյանն էլ նկատեց, որ ուղեցույցում ոստիկանական հարկադրանքի կիրառումը բաց է մնացել. «Այ դուք էլ օրինակ բերեցիք, որ երբ հանձնաժողովի նախագահը պահանջում է քաղաքացուն դուրս գալ տեղամասից, ու վերջինս չի կատարում, պետք է ուղեցույցում ոստիկանի միջամտության սահմանները հստակ նկարագրվի: Համակարծիք եմ նաեւ օպերատիվ շտաբերի գործառույթները ուղեցույցում բացվեն»:
Արփինե ՍԻՄՈՆՅԱՆ