Արեւելյան Եվրոպայի տարածաշրջանային հակադոպինգային կազմակերպության նախագահ, բժշկական գիտությունների դոկտոր Արեգ Հովհաննիսյանը Aravot.am-ի խնդրանքով մեկնաբանեց, թե Պեկինի եւ Լոնդոնի օլիմպիական խաղերի դոպինգ նմուշների կրկնակի ստուգումներից հետո պաշտոնական մրցումներից ժամանակավորապես հեռացված ծանրորդներ Տիգրան Գ. Մարտիրոսյանի ու Հռիփսիմե Խուրշուդյանի մարզական ճակատագրի մասին որեւէ նորություն դեռ չկա՞:
«Մինչեւ այսօր ՄՕԿ-ը դեռ չի վերջացրել իր քննարկումները: Այդ պատճառով միջազգային ոչ մի ֆեդերացիա վերջնական փաստաթղթերը դեռ չի ստացել, որպեսզի ինքն իր գործընթացը սկսի: Օրերս ՄՕԿ-ը խոստացել է, թե մեկ-երկու շաբաթում կկողմնորոշվի: Դրանից հետո ի՞նչ որոշում կկայացնեն միջազգային ֆեդերացիաները, ես դրա պատասխանը չունեմ:
Մի քանիսը հակված են այն մտքին, որ այդ մարզիկները արգելված նյութեր օգտագործել են 2009 թվականի հակադոպինգային օրենքների ժամանակ եւ այդ օրենքները նախատեսում են երկու տարվա որակազրկում: Խնդիրն այն է, թե այդ որակազրկումները, եթե այդպիսիք լինեն, կկիրառվեն 2009 թվականի՞ց, թե 2016-ից: Այս հարցի պատասխանը ոչ ոք չունի եւ, հավանաբար, դեռ պետք է մոտ երկու շաբաթ էլ սպասել», պատասխանեց Արեգ Հովհաննիսյանը:
ԱՇՈՏ ՀԱԿՈԲՅԱՆ
Կարդացեք նաև
Հ.Գ. Արեգ Հովհաննիսյանի հետ հարցազրույցը կարդացեք «Առավոտի» վաղվա համարում:
