«Առավոտի» նախորդ համարում տեղեկացրել էինք՝ հունիսի 15-ին «Երկրապահ» պատգամավորական խումբը կկազմավորի աշխատանքային խումբ, որի գործունեության հիմնական ուղղությունն ընտրական օրենսգիրքն է լինելու։ Խնդրո առարկայի վերաբերյալ պարզաբանում տալով «Առավոտի» ընթերցողին, «Երկրապահ» պատգամավորական խմբակցության նախագահ Սմբատ Այվազյանն ասաց, որ աշխատանքային խումբն արդեն ձեւավորվել է։ Նրանում ընդգրկված են «Երկրապահ» պատգամավորական խմբի այն անդամները, որոնք նաեւ անդամ են ԱԺ պետաիրավական հանձնաժողովի։ Որոշ ժամանակ անց աշխատանքային խմբին մաս կազմող Վիկտոր Դալլաքյանին, Հովհաննես Ահարոնյանին եւ Հայկարամ Մխիթարյանին կմիանա նաեւ Սմբատ Այվազյանը։
Տեղեկացնենք, որ աշխատանքային խմբի հետ ընտրական օրենսգրքի վրա կտքնեն ոլորտի երեք փորձագետ եւս, «որոնց հետ միասին կփորձենք նախապատրաստել ընտրական օրենսգրքի մեր նախագիծը»։ Սմբատ Այվազյանն այնուհետեւ ասաց, թե ընտրական օրենսգրքի նախապատրաստման որոշակի ընթացքից հետո «Երկրապահը» քաղաքական կոնսուլտացիաներ կսկսի՝ առաջին հերթին խորհրդարանում ներկայացված խմբերի եւ խմբակցությունների հետ։
Ըստ որոշ աղբյուրների, «Երկրապահ» պատգամավորական խմբի ընտրական օրենսգրքի հիմնական հեղինակն ու գաղափարախոսը ԱԺ պետաիրավական հանձնաժողովի փոխնախագահ Վիկտոր Դալլաքյանն է լինելու։
ԲԱ ՀԵՐՈՅԱ՞ՆԸ
Կարդացեք նաև
Ըստ էության, հաստատվեց այն տեղեկատվությունը, որ ԱԺ պատգամավոր Ալբերտ Հերոյանն այլեւս չի գլխավորում կոնյակի գործարանը։ Եվ սա վերջինիս ասուլիսից ընդամենը 2-3 օր անց, երբ այլեւս նախկին տնօրենը պնդում էր, թե կոնյակի գործարանը պետք է վաճառվի։ Սմբատ Այվազյանն այս հարցի վերաբերյալ պարզաբանեց, թե ըստ իր ունեցած տեղեկատվության, Ալբերտ Հերոյանին «Պեռնո Ռիկարի» ներկայացուցիչներն առաջարկել են զբաղեցնել կոնյակի գործարանի կոմերցիոն գծով տնօրենի պաշտոնը, սակայն վերջինս, չհամաձայնելով, ինքն է հրաժարվել հետագա աշխատանքային գործունեությունը այդ ոլորտում ծավալելուց։
ԻՍԿ ՎԱՐՉԱՊԵՏԻ ՀԵՏ
«Երկրապահ» պատգամավորական խումբը, ըստ «Առավոտ» հասած տեղեկությունների, առաջիկա օրերին, իսկ ավելի ստույգ՝ հավանաբար հունիսի 17-ին գումարվելիք ԱԺ արտահերթ նիստից հետո, հանդիպում կունենա վարչապետ Արմեն Դարբինյանի հետ։ Այս տեղեկատվությունը «Երկրապահ» պատգամավորական խմբի նախագահ Սմբատ Այվազյանը հաստատեց։ Նա ավելացրեց նաեւ, թե այնպես է ստացվել, որ հանդիպման նախաձեռնությունը դրսեւորվել է երկուստեք։ Փաստորեն, փոխադարձորեն միմյանց հանդիպելու ցանկություն է դրսեւորվել։ Խմբի ղեկավարն ասաց նաեւ, որ հանդիպման ժամանակ նպատակ կա ճշտել «Երկրապահի» եւ կառավարության համագործակցության սկզբունքներն ու մեխանիզմները։ Այս հարցում թե՛ «Երկրապահն» է շահագրգիռ, եւ թե՛ վարչապետը։
Արմեն ԶԱՔԱՐՅԱՆ
