Մի քանի օր առաջ Նորքի I զանգվածի բնակիչներից ահազանգ ստացանք, որ Գայի արձանի մոտ ինչ-որ մարդիկ անխնա կտրում են ծառերը։ Յուրաքանչյուր հատված ծառ անմիջապես տեղափոխվում է, իսկ տեղը՝ բետոնապատվում։
Բնակիչներին այդպես էլ չի հաջողվել «անտառահատներից» եւ շինարար-բանվորներից որեւէ ստույգ պատասխան ստանալ, թե ո՞րն է այդ ամենի նպատակը։ Մի անգամ ասել են, թե երեխաների համար կարուսել են սարքում, մի ուրիշ անգամ՝ սրճարան։ Բնակիչները հավատացնում են, որ դիմել են քաղաքապետարան, այնտեղ (որքան հիշում էին՝ քաղաքի գլխավոր ճարտարապետը) նրանց ասել են, թե «մի հինգ մետր ենք թույլ տվել»։ Հինգ թե տասը, բնակիչները, միեւնույն է, բողոքում են եւ պահանջում չզրկել իրենց եւ իրենց երեխաներին մաքուր օդ շնչելու հնարավորությունից։ Մեր փորձերը՝ կապվելու Երեւանի գլխավոր ճարտարապետ Համլետ Խաչատրյանին, ապարդյուն անցան։ Այնպես որ, նրանից չհաջողվեց ճշտել «հինգ մետրի» պատմությունը։ Քաղաքապետարանի բնական գոտիների վարչության պետի տեղակալ Ռոմիկ Կոսեմյանը հայտնեց, որ կատարվածից տեղյակ չեն (ի դեպ, բնակիչներն ասում էին. «մի շաբաթ է՝ հուպ են տալիս» – Ա. Գ.)։ Խոստացավ ահազանգել, ուր որ հարկ է։
Մի քանի ժամ անց նրանից տեղեկացանք, որ նա հայտնել է քաղաքապետարանի շինվերահսկողության վարչություն։ Այնտեղ պարզվել է, որ վերոնշյալ շինարարության համար չկա թույլտվություն։ Աշխատանքները դադարեցվել են։ Նույնը հաստատեցին նաեւ քաղաքապետարանի ճարտարապետական շինարարական վերահսկողության վարչությունում։ Այստեղ իմացանք նաեւ այն, որ գոյություն ունի բացօթյա սրճարանների մասին քաղաքապետի որոշումը։ Միայն թե այս դեպքում շինարարությունը համաձայնեցված չի եղել բնապահպանության վարչության հետ։ Շինվարչության պետի տեղակալ Սարդար Ադամյանն ասաց, որ անօրինական շինարարության մասին իրենք տեղյակ են պահել Նորք-Մարաշ թաղապետին եւ ՆԳ բաժին։ Շինարարությունը կասեցված է։ Մեր այն հարցին, թե մինչեւ ե՞րբ, պրն Ադամյանն ասաց. «Մինչեւ էկոլոգիայի եւ կանաչապատման վարչության հետ համապատասխանեցնելը»։
Չենք կարծում, թե համապատասխանեցնելը շատ կուշանա. գարուն է, ուր-որ է՝ ամառն էլ կգա, բացօթյա սրճարանների իսկական ժամանակը։ Այնպես որ, եթե մինչ այդ ծառերը հատվում էին ապօրինաբար, այնուհետեւ այդ կլինի բացառապես օրենքի սահմաններում։ Երեխաներն էլ մաքուր օդ շնչելու փոխարեն թող պաղպաղակ ուտեն. հայրենական արտադրությանը զարկ տալ պե՞տք է, թե՞ ոչ։
Կարդացեք նաև
Ա. ԳՐԻԳՈՐՅԱՆ
