Մայիսի 5-ից հանրապետությունով մեկ իր նախընտրական շրջագայություններն է սկսում Կարեն Դեմիրճյանի եւ Վազգեն Սարգսյանի «Միասնություն» դաշինքը։ Այսօր միասնականների հանգրվանը կլինի հիմնականում Արարատի մարզը։ Ե՛վ Կարեն Դեմիրճյանը, ե՛ւ իր կողմնակիցները կշրջագայեն ինչպես մարզի գյուղերով, այնպես էլ՝ քաղաքներով։
ԱՌԱՆՑ ՀԱՆԴԻՊՄԱՆ, ԱՌԱՆՑ ԲՈՂՈՔԻ
ԿԸՀ նիստի ժամանակ անդամներից մեկին հետաքրքրում էր, թե պահպանվո՞ւմ է արդյոք ՀՀ ԱԺ պատգամավորության թեկնածու Վանո Սիրադեղյանի՝ իր ընտրողների հետ հանդիպելու իրավունքը։
Կարդացեք նաև
-Համենայնդեպս, այդ մասին ԿԸՀ ոչ ոք չի բողոքել,- ասաց ԿԸՀ նախագահ Արտակ Սահրադյանը։
ԿԵՐ ԵՎ ԸՆՏՐԻՐ
Հավաստի աղբյուրից «Առավոտին» հայտնի դարձավ, որ Երեւանի թիվ 18 ընտրատարածքում պատգամավորության թեկնածու առաջադրված Մարտին Հովհաննիսյանը սկսել է աշխուժորեն ընտրակաշառք բաժանել։ Մասնավորապես պրն Հովհաննիսյանը իր գթասիրությունն է ցուցաբերել ծերերի եւ երեխաների նկատմամբ՝ նրանց նվիրելով գնդակներ եւ ամեն օր սնունդ բաժանելով։ Հավաստի աղբյուրը նշեց նաեւ, որ պրն Հովհաննիսյանի հիշողությունում փայլատակումներ են տեղի ունեցել եւ նա վերջապես վերադարձնում է մարդկանց 8 ամսվա աշխատավարձերը։ Հիշեցնենք, որ Մարտին Հովհաննիսյանը «Կրեդիտ Երեւան» բանկի նախագահն է։
ՏԵՂԻՆ ԽՈՐՀՈՒՐԴ
«Երկրապահ» պատգամավորական խմբի սենյակից մայիսի 4-ին նախարարներից մեկի օգնականի հետ ջղային տոնայնությամբ խոսում էր ԱԺ պատգամավոր Հերմինե Նաղդալյանը։ Քանի որ հեռախոսով չէին կապում նախարարի հետ, տիկին Հեղինեն պահանջում էր, որ իր զրուցակիցը զանազանի, թե ով է տվյալ պահին ցանկանում նախարարի հետ խոսել։ Խորհուրդն ըստ էության տեղին էր, ու մի 15 րոպեից տիկին Հերմինեին միացրեցին։