Հոկտեմբերի 15-ին խորհրդարանում ստորագրություններ էին հավաքվում «Նաիրիտի» տնօրեն Գագիկ Ներսիսյանին ազատ արձակելու համար։ Նախաձեռնողը «Իրավունք եւ միաբանություն» խմբակցության անդամ Գագիկ Կոստանդյանն էր։ Տեղեկություններ կան, որ նույն նպատակով ստորագրահավաք է իրականացրել նաեւ ԱԺ պատգամավոր Հակոբ Հակոբյաններից մեկը՝ առայժմ պարզ չէ, թե որը։
ԱՖՐԻԿԱ ԷԼ ՀԱՍԱՆՔ
Կա այսպիսի երկիր՝ Կոտ Դիվուար, որը նախկին Փղոսկրե Ափ պետությունն է։ Հայաստանի Հանրապետությունն այնտեղ ունի պատվո հյուպատոս բոլորին անճանաչ անունով՝ Ռայմոնդ Եզեկլյան։ Սա լուրջ առաջընթաց է Հայաստանի եւ Փղոսկրե Ափի միջեւ բարիդրացիական հարաբերություններ հաստատելու գործում։
Կարդացեք նաև
ՕՐԵՆՔԸ ԽԱԽՏՎԱԾ Է
Չնայած կա համապատասխան որոշում, որ Հայաստան ներմուծված արտասահմանյան ծխախոտի վրա պետք է գրված լինի հայերեն, սակայն այսօր էլ Երեւանում կարելի է գնել հայերեն մակագրություն չունեցող ծխախոտ, որի վրա նույնիսկ աքցիզային դրոշմանիշ չկա։
ՇԱԲԼՈՆԻՑ ԴՈՒՐՍ
Հայաստանի Պահպանողական կուսակցությունը հանդես է եկել հայտարարությամբ, որում շնորհավորում է ՀՀ առաջին նախագահին՝ իր ընտրվելու 8 տարվա տարելիցի կապակցությամբ (առաջին նախագահական ընտրությունները տեղի են ունեցել 91 թվականի հոկտեմբերի 16-ին)։ Իսկ երիտասարդ պահպանողականների միությունն առաջիկա տեղական ինքնակառավարման ընտրություններում պաշտպանում է Արարատ Զուրաբյանին։
