Ազգային ժողովի պատգամավորներից մի քանիսն այն կարծիքին էին, որ պառլամենտի ներկա՝ անհավես ու անօգնական վիճակի փրկություն կարող է դառնալ գոնե պատգամավորների հասանելիք ձմեռային արձակուրդը։ Բայց դե մինչեւ արձակուրդ դեռ մեխանիկորեն կգան նիստերի։
Պետք է նկատել նաեւ, որ հոկտեմբերի 27-ի դեպքերից հետո պատգամավորները բավականաչափ զգուշավոր են դարձել միջանցքային եւ կաբինետային շփումներում։ Որոշ պատգամավորներ առանձին զրույցներում անհանգստացած էին Երկրապահ կամավորական միության համագումարի եւ նախագահի թեկնածուների հարցով։ Կարծում են, թե ՀՀ նախագահը եւ որոշ պաշտոնյաներ շահագրգռված են գեներալ Մանվել Գրիգորյանին (Էջմիածնի Մանվելին) Երկրապահի նախագահի պաշտոնում նշանակել՝ Երկրապահ կամավորական միությունը հասարակության աչքում վարկաբեկելու միտումով։
Իշխանությանը չհարող թեւը մտածում է, թե ԵԿՄ նախագահ պետք է ընտրել Երեւանի քաղաքապետ, ԵԿՄ վարչության փոխնախագահ Ալբերտ Բազեյանին, որը, ի տարբերություն վերոնշյալ գեներալ թեկնածուի՝ մաքուր է իր գործունեությամբ։ Որքան հայտնի է, այդ հարցով մտահոգ մի շարք պատգամավորներ Ա. Բազեյանին համոզում են ստանձնել ԵԿՄ վարչության նախագահի պաշտոնը։
Պետք է սպասել, թե դեպքերն ի շահ որ թեւի կզարգանան։ Այնուամենայնիվ, ԵԿՄ համագումարը տեղի կունենա հոկտեմբերի 27-ի ոճրագործության զոհ դարձած քաղաքական գործիչների քառասունքից ոչ շուտ։
Կարդացեք նաև
Ռոբերտ Քոչարյանը վերջերս տված հեռուստահարցազրույցում այսպիսի հայտարարություն արեց. «…Այս կտրվածքով հնչեց նաեւ հայտնի, այսպես ասենք, իմ հրաժարականի մասին հայտարարությունը։ Որից հետո ես պարզել եմ, որ, այո, բանակը կապ չուներ։ Հիմնականում այն մարդիկ էին, որոնք հենց այդ պահին փորձում էին կրքերը բորբոքված այդ վիճակն օգտագործել իրենց խնդիրները լուծելու համար։ Միանշանակ իմ գնահատականը սա է։ Որովհետեւ բոլոր հրամանատարները, բանակի կազմը, հատկապես հրամանատարները, որոնք շատ ակտիվ մասնակցել են մարտական գործողություններին, իրենց շատ վատ զգացին, նույնիսկ, իրենց լսելով, որ այդպիսի երեւույթ տեղի է ունեցել (…)»։
Ըստ տեղեկությունների, ՀՀ նախագահի խոսքից մեջբերվածի վերջին տողը վերաբերում էր հենց Մանվել Գրիգորյանին։ Սա շատերին մտածելու տեղիք է տալիս, թե գեներալը կրկնակի խաղ է խաղում։
Իսկ առայժմ քաղաքականապես էական հարց է՝ ներկայիս քաղաքական վիճակի առաջ կամ հետ զարգացման առումով, թե ով կլինի ԵԿՄ վարչության նախագահը։ Սրանով կարելի է լուրջ կանխատեսումներ կատարել։
ՍԱԹԻԿ ՍԵՅՐԱՆՅԱՆ
