Ըստ հավաստի աղբյուրների՝ այժմ կարգի է բերվում հանրապետության վարչապետի համար նախատեսվող կառավարական ամառանոցը, ուր առաջիկայում ընտանիքով Արարատից պիտի տեղափոխվի վարչապետը։ Նրա հետ կտեղափոխվի նաեւ մայրը՝ տիկին Գրետա Սարգսյանը։ Մինչ այժմ կառավարական ամառանոց չտեղափոխվելը պայմանավորված էր տիկին Գրետայի ցանկությամբ, որը եւ հարգում էր որդին՝ վարչապետ Արամ Սարգսյանը։ Սակայն անվտանգության կանոնները պահպանելու նպատակով վարչապետը շուտով կտեղափոխվի ամառանոց։
ՍԵԼԵԶՆՅՈՎԻ ՍԵՆՍԱՑԻՈՆ ՀԱՅՏԱՐԱՐՈՒԹՅՈՒՆԸ
Ըստ լրատվական գործակալությունների, Պետդումայի խոսնակ Գենադի Սելեզնյովը հայտարարել է, որ եթե Կարեն Դեմիրճյանը չսպանվեր, ապա մոտ ապագայում Հայաստանը կդառնար երրորդը Ռուսաստան-Բելառուս միությունում։ Գենադի Սելեզնյովը ասել է նաեւ, որ եթե Կարեն Դեմիրճյանը չսպանվեր, ապա մի քանի օրից մտադիր էր պաշտոնապես հայտարարել, որ Հայաստանի խորհրդարանում սկսվում է Ռուսաստան-Բելառուս դաշինքին Հայաստանի անդամակցելու հարցի քննարկման գործընթացը։
Կարդացեք նաև
ԷԼԻ ՄԵԿ ԶՈՀ
Ձերբակալվել է «Հայռուսգազարդ» ՊՓԲ ընկերության փոխտնօրեն, «Բութանգազ» ՊՓԲԸ տնօրեն Սիմոն Գրիգորյանը, որը կալանքի տակ է պահվում հոկտեմբերի 17-ից։ Հիշեցնենք, որ Սիմոն Գրիգորյանը նախկին գումարման ԱԺ անդամ էր, «Երկրապահ» պատգամավորական խմբի անդամ։
ՏԵՂԵԿԱՏՎՈՒԹՅԱՆ ՊԱԿԱՍ
ԱԺ-ում տեղի ունեցած «Կայունություն» խմբի եւ «Միասնություն» խմբակցության հերթական համատեղ նիստի ժամանակ վերջինիս նորընտիր քարտուղար Վարդան Մկրտչյանն «Առավոտին» հայտնեց, որ քննության են առնվել տեղեկատվության ոլորտին առնչվող խնդիրներ։ Դա մասնավորապես վերաբերում է Ստամբուլի գագաթաժողովին, որի մասին պատգամավորները սկզբնաղբյուրից հավաստի տեղեկատվություն ստանալու հնարավորություն չեն ունեցել։
