Երկրաշարժի 11-րդ տարելիցը Գյումրին դիմավորեց 15 հազար դեռեւս անօթեւան ընտանիքներով ու բազում հիմնահարցերով:
Նախկին ԽՍՀՄ-ի աղետի հետեւանքների վերացման երկամյա ծրագրին հետեւեցին Հայաստանի իշխանությունների երկու ձախողված ծրագրերը: Երրորդը խոստանում է մինչեւ 2001թ. վերացնել աղետի հետեւանքները:
Երեկ երկրաշարժի զոհերի հիշատակը հարգելու համար Գյումրի ժամանեցին ՀՀ նախագահ Ռ.Քոչարյանը, Ամենայն Հայոց Գարեգին Բ կաթողիկոսը, ԱԺ պատգամավորներ, կառավարության անդամներ, երկրի քաղաքական-հասարակական կազմակերպությունների, զինվորականության ներկայացուցիչներ:
Մայրաքաղաքից ժամանած բարձրաստիճան հյուրերը «Շիրակ» գերեզմանատանը ծաղկեպսակներ դրեցին անհայտ զոհերի խաչքար-հուշարձանին եւ մեկ րոպե լռությամբ հարգեցին նրանց հիշատակը:
Կարդացեք նաև
Հոգեւորականները Վեհափառ Հայրապետի գլխավորությամբ հոգեհանգստյան արարողություն կատարեցին:
Այնուհետեւ ՀՀ նախագահն ու նրան ուղեկցող անձինք Գյումրիի սուրբ Աստվածածին եկեղեցում ներկա եղան զոհերի հոգեհանգստյան պատարագին, որտեղ գյումրեցիներին իր հայրապետական օրհնությունն ու գոտեպնդիչ խոսքն ուղղեց Ամենայն Հայոց կաթողիկոս Գարեգին Երկրորդը:
-Այսօր եկել ենք՝ մեր հարգանքի տուրքը մատուցելու եւ մխիթարելու ձեզ ձեր ցավի մեջ: Աղետից 11 տարի է անցել, սակայն դեռեւս ամոքված չեն ձեր հոգու վրա բացված վերքերը: Մենք հավատացած ենք, որ Աստծո, հայրենիքի, ժողովրդի շնորհիվ կվերականգնենք մեր հայրենի տունը: Մեր աղոթքն է, որ Տերը իր զորավոր աջը հովանի դարձնի մեր ժողովրդի վրա:
Պատարագից հետո Ռ.Քոչարյանը եւ պատվիրակությունը մեկնեցին Գյումրիից:
Շիրակի մարզպետի կարգադրությամբ մարզում դեկտեմբերի 7-ը հայտարարված է ոչ աշխատանքային օր: Ներքաղաքային տրանսպորտն աշխատում էր անվճար, սակայն քաղաքում հացի խնդիր կար. գործարարները չէին անսացել հացը կես գնով վաճառելու քաղաքապետարանի խնդրանքին: Ուստի մարդկանց մեծ մասի օրն անցավ հանապազօրյա հացի փնտրտուքով:
ԱՐՄԵՆՊՐԵՍ
