Անցած տարվա «Նիզավիսիմայա գազետա» թերթի վերջին համարում հրապարակվել է Իվան Սոտնիկովի «Չիրականացված երազների աշուն. Հայաստանի գլխավոր խնդիրն է դարձել անկանխատեսելիությունը» հոդվածը։ Հրապարակման մեջ, ի թիվս հոկտեմբերի 27-ի ողբերգական իրադարձությունների մի շարք վարկածների, հեղինակը բերում է հետեւյալը. երկրում փորձ էր արվել պետական հեղաշրջում կատարել վերեւից։ Հոդվածագիրը հիշեցնում է, որ 98 թվի սկզբին այն ժամանակվա վարչապետ Ռոբերտ Քոչարյանը, պաշտպանության նախարար Վազգեն Սարգսյանը եւ հատուկ ծառայությունների ղեկավար Սերժ Սարգսյանը ստիպեցին Հայաստանի առաջին նախագահ Լեւոն Տեր-Պետրոսյանին հրաժարական տալ։
Դրանից հետո, քիչ ժամանակ անց, ըստ հոդվածի հեղինակի, Վազգեն Սարգսյանը իր զինակիցների նեղ շրջանակում սկսեց կրկնել, թե Տեր-Պետրոսյանի հրաժարականը սխալ էր, եւ զղջում էր իր արածի համար։ Նրան դուր չէին գալիս իր երբեմնի համախոհների որոշ քայլեր։ Օրինակ, Քոչարյանի մտերմությունը դաշնակցական ազգայնականների հետ եւ իշխանությունը վերաբաշխելու բացահայտ հակվածությունը։
Ի. Սոտնիկովը գրում է, որ նրանք, ովքեր ողջունում էին Տեր-Պետրոսյանի իշխանության անկումը, փափագում էին նախորդ ռեժիմի արյունը, սեփականության արմատական վերաձեւում եւ արտաքին քաղաքականության մեջ կտրուկ փոփոխություններ։ Նրանց սպասումները չիրականացան։
Վազգեն Սարգսյանը օգտագործելով իր բոլոր լծակները, փորձում էր շարունակել Տեր-Պետրոսյանի քաղաքականությունը առանց Տեր-Պետրոսյանի։ Դա արվում էր այնքան բացահայտ, որ նախագահամետ ԶԼՄ-ները սկսեցին խոսել հակաժողովրդական ռեժիմի վերականգնման փորձերի մասին։ Իսկ երբ ժողովուրդը խորհրդարանական ընտրություններում հստակորեն ցույց տվեց, թե ում է նա պաշտպանում, ակներեւ դարձավ, որ իշխանության հերթական փոփոխությունը երկրում, ըստ ամենայնի, անխուսափելի է։ Այդ ամենը, ըստ «Նեզավիսիմայա գազետա» թերթի մեկնաբան Իվան Սոտնիկովի, նախորդել էր հոկտեմբերի 27-ի իրադարձություններին։
Կարդացեք նաև
Ա. Ա.
