ՀԱՅԱՍՏԱՆ՝ ԿԱԶԻՆՈ ԵՎ ՍԱՈՒՆԱ ԲԱՑ ԵՐԿՆՔԻ ՏԱԿ «Այսօրվանից ուզում եմ կոչ անել մեր գործարարներին՝ ձե՛ռք քաշեք, մեկ է, արգելվելու է,- հայտարարեց Արշակ Սադոյանը։- Խորհրդարանը թույլ չի տա, որ այս Հայաստան երկիրը դառնա խաղատուն»։ Բարով-խերով լուծելով «գայթակղության եւ մոլության որջերի»՝ կազինոների հարցը, պատգամավորները սկսեցին ակնարկներ անել նաեւ սաունաների հասցեին, որոնց անվան տակ, ըստ նրանց, այլ «որջեր» են գործում, գիշերն այնտեղ ինչե՜ր են կատարվում։ «Իսկ ո՞ւր է պետության կարգավորիչ դերը»,- ամբիոնից հարցնում էր Վարդան Այվազյանը, իսկ դահլիճում նրա որոշ գործընկերները, որ նաեւ նման սաունաների տեր են՝ անհանգիստ շարժումներ էին անում։ Նրանց նկատմամբ կարեկցանքն էր մեզ առաջնորդողը, երբ Գագիկ Արզումանյանին հարցրինք, թե գուցե կառավարությունը մտադիր է նաեւ սաունաների՞ ոլորտում օրենսդրական կարգավորում հաստատել. «Չեմ կարծում»,- պատասխանեց նա։ Մանրամասն՝ 3-րդ էջում։ ԾԱՆՈԹՈՒԹՅՈՒՆ Օրերս հոկտեմբերի 27-ի գործով կալանավորված Հ. Հարությունյանը՝ իր խափանման միջոցի փոխվելուց եւ գործի կարճվելուց հետո, վերջապես ծանոթացել է նույն ճակատագրին արժանացած Ալեքսան Հարությունյանի եւ Մուշեղ Մովսիսյանի հետ։ Քանի որ Մ. Մովսիսյանի հետ ծանոթությունը տեղի է ունեցել «Առագաստ» սրճարանում, Հարությունյանը հուսով է, որ այն չի որակվի որպես «նախապես կազմակերպված գաղտնի հանդիպում «Առագաստ» սրճարանում»։ Կարդացեք էջ 6։ ՀՄԱՅԱԿԱՀԵՌԱՑՈՒՄ ԱԺ պատգամավոր, ՀԺԿ քաղաքական խորհրդի անդամ Հմայակ Հովհաննիսյանին մեկ անգամ արդեն սկզբնական կազմակերպության որոշմամբ հեռացրել են կուսակցությունից։ Ավելի մանրամասն՝ 2-րդ էջում։