Երեկ ԱԺ պետաիրավական հանձնաժողովի կազմակերպած լսումների ընթացքում ՆԳ փոխնախարար Հովհաննես Վարյանն անդրադարձավ հոկտեմբերի 30-ից առաջ Արկադի Վարդանյանի տարածած թռուցիկի այս տողերին. «Եվ թող յուրաքանչյուրը լիովին գիտակցի, որ հասել է ամենակարեւոր մարտական սխրանքի ժամը մեր ազգային ազատագրական տեւական պայքարի ողջ պատմության ընթացքում»։ Փոխնախարարի մեկնաբանությունը հետեւյալն էր. «Ես պատկերացրի, որ գյուղացին, որն ավտոմատը հորել է գոմում, պատերազմից հետո ի՞նչ պիտի ինքը մտածի։ Ի՞նչ է նշանակում էդ իրա՝ ազգի համար սխրագործության մոմենտն ա եկել… Դավայ դե՛ զենքը կվերցնի ու…»։
ՀՈԿՏԵՄԲԵՐԻ 27 ՊԵՏԵԿԱՄՈՒՏՆԵՐԻ ՆԱԽԱՐԱՐՈՒԹՅՈՒՆՈՒՄ
Հարկային մարմինների մի աշխատակից «Առավոտին» պատմեց հետեւյալը։ Պետեկամուտների նախկին նախարար Գագիկ Պողոսյանն իր շարժական բազկաթոռին նստած՝ ետուառաջ հրվելով զրուցում է իր տեղակալ Երվանդ Զախարյանի հետ, երբ հանկարծ նրա ոտքից դուրս պրծած «չստիկը» պատահաբար դիպչում է սեղանի տակ տեղադրված տագնապի ազդանշանի կոճակին։ Շրխկոցով բացվում են աշխատասենյակին կից մի քանի դռներ, եւ ավտոմատները պատրաստ բռնած թիկնապահների սարսափազդու տեսքից ահաբեկված՝ Երվանդ Զախարյանը նետվում է Գագիկ Պողոսյանի սեղանի տակ, այստեղ հայտնաբերելով սույն ահաբեկչության կազմակերպիչ եւ ուղղորդիչ «չստիկին»։
Կարդացեք նաև
ԿԵՐԱ՞Ր
ԱԺ բուֆետում ձվածեղ ուտող պատգամավոր Մելիք Գասպարյանը առիթը չկորցրեց սրամտել՝ տեսնելով Լուսակերտի թռչնաբուծական ֆաբրիկայի փաստացի ղեկավար, պատգամավոր Հարություն Փամբուկյանին. «Հարո՛ւթ, էս քո՞ ձվերն են»։ Վերջինս ակնթարթորեն կողմնորոշվեց եւ ժպտադեմ պատասխանեց. «Հա, ցավդ տանեմ, արխային կե՛ր»։
