Լինարեսում (Իսպանիա) ավարտվում է 19-րդ կարգի շախմատի միջազգային մրցաշարը։
Պետեր Լեկոյին պարտության մատնելուց հետո, յոթերորդ տուրում Գարրի Կասպարովը սեւերով ոչ-ոքի արեց հունգարուհի Յուդիթ Պոլգարի հետ։ Երիտասարդ գրոսմայստեր, ռուսաստանցի Ալեքսանդր Գրիշչուկը պարտության մատնեց փորձառու Անատոլի Կարպովին, իսկ Ալեքսեյ Շիրով (Իսպանիա)-Պետեր Լեկո (Հունգարիա) պայքարում կողմերը խաղաղ դաշն կնքեցին։
Յոթ տուրից հետո Գարրի Կասպարովը 5.0 միավորով պահպանում է միանձնյա առաջատարի իր դիրքերը։ Յուդիթ Պոլգարն իր անվան դիմաց մեկ միավոր պակաս է գրանցել եւ ընթանում է երկրորդ տեղում։ Ուժեղների եռյակը 3,5 միավորով եզրափակում է Ալեքսեյ Շիրովը։ Լեկոն եւ Գրիշչուկը վաստակել են 3.0-ական միավոր։ Անատոլի Կարպովը շատերի համար անսպասելի հանգրվանել է մրցաշարային աղյուսակի վերջին հորիզոնականում (2,5 միավոր)։
Այնուամենայնիվ, վճռական իրադարձությունները տեղի ունեցան հաջորդ տուրերում։ 8-րդում Կասպարովը սպիտակներով 38-րդ քայլում ծնկի բերեց Շիրովին ու ժամկետից շուտ մրցակիցների համար այլեւս անհասանելի դարձավ։ Կարծես, քնից արթնացավ նաեւ Կարպովը, որն առավելության հասավ Պոլգարի նկատմամբ։ Իսկ ահա Լեկոն եւ Գրիշչուկը միմյանց հրաժեշտ տվեցին խաղաղասիրաբար։
Կարդացեք նաև
9-րդ տուրում արդեն հաղթող դարձած Կասպարովը ասես բարիացել էր։ Եվ դա էր հավանաբար պատճառը, որ նա միավորը բաժանեց Կարպովի հետ։ Պոլգար-Լեկո մրցապայքարում էլ հնարավոր չեղավ կոտրել միմյանց դիմադրությունը՝ 1,5։1,5։
Ա. ՀԱԿՈԲՅԱՆ
