ՊՆԴՈՒԿ, ԾԱՄՈՆ՝ ՄԱՀՃԱԿԱԼԻՆ Զարմանալի ազգ ենք։ Զարմանալի քաղաքապետարան ունենք։ Մայրաքաղաքի նույնիսկ երկրորդական փողոցներն արդեն «մաքրել» են փողոցային անկանոն առեւտրից, բայց մայրաքաղաքի թիվ մեկ հրապարակում՝ Հանրապետության հրապարակում, տրանսպորտի եւ կապի նախարարության մուտքի մոտ, բառացիորեն քթի տակ, հոյակերտ կամարի տակ, որը «Էրեբունի» հյուրանոցը կապում է հրապարակին եւ որով ամեն օր բազմաթիվ զբոսաշրջիկներ են անցնում, ահա հենց այստեղ, ծալովի մի կեղտոտ մահճակալի վրա (որը որպես սեղան է ծառայում տերերի համար), ամեն Աստծո օր վաճառքի է հանվում է՛լ արեւածաղկի սերմ ու պնդուկ, է՛լ չիր ու չամիչ… տեսնելո՜ւ բան է։ Իսկ ովքեր են վաճառողները… Փնթի մի գերդաստան, մեկը մեկից կեղտոտ ու, չզարմանաք… տկարամիտ։ Որտե՞ղ ես, քաղաքապետ, որտե՞ղ եք, օրինապահներ։ Քաղաքապետը՝ չգիտեմ, բայց օրինապահ ոստիկանները միշտ այնտեղ են։ Երեւի «նալոգը» բոլ-բոլ է, դրա համար էլ հսկում են, որ իրենց «կլիենտին» որեւէ մեկը չնեղացնի։ Նախարարության պահակային ծառայության աշխատակիցներն էլ միշտ այստեղ են եւ «օգտվում» են այդ սեղանից։ ՎԱԼԵՐԻ ԿԱՄՍԱՐՅԱՆ
