ՄԻՏՔՆ ՈՒ ՍԻՐՏԸ՝ ԵՐԿՆՔՈՒՄ «Ընկեր Ֆերդինանդ»։ Այսպես են բոլորը դիմում նրան՝ ՀՀ կրթության եւ գիտության նախարարության տեխնիկական ստեղծագործության հանրապետական կենտրոնի տնօրեն Ֆերդինանդ Ղարիբյանին։ 60 տարեկան է, որից 48-ը նվիրաբերել է ավիամոդելային սպորտին, վերջին 42-ը՝ որպես մարզիչ-մանկավարժ։ Այդ ընթացքում հարյուրավոր սաներ է ունեցել, որոնք ոչ միայն յուրացրել են այս բնագավառի գաղտնիքները, այլեւ հետագայում դարձել են գիտության, տեխնիկայի ճանաչված աշխատողներ, ավիացիոն ինժեներներ, օդաչուներ։ Տասնյակներով կարելի է հաշվել ընկեր Ֆերդինանդի աշակերտներին, ովքեր հաղթող են ճանաչվել հանրապետական, նախկին միութենական առաջնություններում, արժանացել են մրցանակային տեղերի… 60-ական թվականներին, երբ մարդը նվաճեց տիեզերքը, Ֆ. Ղարիբյանը Հայաստանում առաջինը դրեց հրթիռամոդելիզմի հիմքը։ Նրա խմբակների սաների ձեռքերով պատրաստված աշխատանքները ցուցադրվել են միջազգային ցուցահանդեսներում՝ ԱՄՆ, Ճապոնիա, Հոլանդիա, Հնդկաստան, Բուլղարիա, արժանացել մրցանակների եւ խրախուսանքների։ Ինքն էլ մասնակցելով տարբեր բարձրակարգ մրցումների, ցուցահանդեսների, որպես հեղինակ, շատ անգամներ նվաճել է ոսկե, արծաթե եւ բրոնզե մեդալներ։ Սպորտի վարպետ է, ՀՀ վաստակավոր մարզիչ, բարձրագույն կարգի մրցավար, պարգեւատրվել է մեդալներով, պատվոգրերով, գովասանագրերով։ Ու, չնայած տարիքին, շարունակում է իր գործը, տեխնիկական մարզաձեւերի պրոպագանդումն ու տարածումը Հայաստանում։ Ք. Հ.
