ՀԻՄՆԱԿԱՆ ՊԱՅՔԱՐՆ ԱՌՋԵՎՈՒՄ Է Տիգրան Պետրոսյանի անվան շախմատիստի կենտրոնական տանը շարունակվում է շախմատի Հայաստանի տղամարդկանց բարձրագույն խմբի 61-րդ առաջնությունը։ Առաջին տուրի վերջին արդյունքը գրանցվեց ուշ երեկոյան։ Գրոսմայստեր Սմբատ Լպուտյանը սպիտակներով հաղթեց վարպետ Գեւորգ Հարությունյանին։ Կարեն Ասրյանն առաջին տուրում ազատ էր։ Երեկ՝ երկրորդ տուրում հանդիպեցին Ասրյան-Խաչատրյան, Արոնյան-Լպուտյան, Հարությունյան- Սարգսյան, Արա Մինասյան-Արտաշես Մինասյան, Անաստասյան-Նալբանդյան զույգերը։ Հանգստանալու օրը Եղիազարյանինն էր։ Առայժմ դժվար է դատողություններ անել՝ պայքարը դեռ նոր է սկսվում։ Գլխավոր իրադարձությունները առջեւում են։ Սակայն կասկած չկա, որ խաղատախտակների առջեւ հետաքրքիր ու սկզբունքային մրցակցություն կծավալվի։ Ասենք միայն, որ այս առաջնությունը դասվում է ՖԻԴԵ-ի 11-րդ կարգում եւ մասնակիցների համար սահմանված են գրոսմայստերի (6,5 միավոր) ու միջազգային վարպետի (4,5) նորմեր։ Ա. Հ.
