ՀԱՅ ԼՐԱԳՐՈՂՆԵՐԸ՝ ԵՐՐՈՐԴ ՏԵՂՈՒՄ Մինի ֆուտբոլի Հայաստանի ժուռնալիստների հավաքականը Օդեսայում անցկացված ԱՊՀ երկրների հերոս քաղաքների ժուռնալիստների թիմերի միջեւ երկրորդ միջազգային մրցաշարից տուն վերադարձավ բրոնզե մեդալներով: Մրցաշարը նվիրված էր Հայրենական մեծ պատերազմում ֆաշիզմի դեմ տարած հաղթանակի 60-ամյակին: Մեր թիմի մրցուղերթին աջակցել էր ՀՀ նախագահը: Հովանավորչական դեր էին կատարել նաեւ «Դոնբասաերո» ավիաընկերությունը, որը թիմին տոմսեր հատկացրել էր 20 տոկոս զեղչով, ինչպես նաեւ Երեւանի կոնյակի գործարանը: Մրցաշարին մասնակցում էին նաեւ Օդեսայի երկու, Վոլգոգրադի, Նիկոլաեւի ու Մինսկի լրագրողական թիմերը, որոնք հաղթողին որոշեցին շրջանաձեւ մրցակարգով: Առաջին հանդիպումը Օդեսայի երկրորդ թիմի հետ ավարտվեց երեւանցիների հաղթանակով՝ 4:2: Սակայն հյուրընկալողների առաջին թիմն անչափ համառ ու դժվարին պայքարում 5:4 հաշվով «վրեժխնդիր» եղավ: Ընդ որում, մեր լրագրող ֆուտբոլիստներն առաջին խաղակեսում առջեւում էին 4:1 հաշվով: Եվ դա այն դեպքում, երբ մրցակից թիմի կազմում հանդես էին գալիս 4-5 պրոֆեսիոնալներ: Երրորդ խաղում հայաստանցի լրագրողները հինգ անպատասխան գնդակ անցկացրին Նիկոլաեւի իրենց գործընկերների դարպասը, որից հետո 5:2 հաշվով համոզիչ հաղթանակ տարան բելառուսցիների նկատմամբ: Մրցաշարն ընթանում էր լրիվ նորմալ մինչեւ Վոլգոգրադի թիմի հետ մեր հավաքականի հանդիպումը, որում, ըստ էության, որոշվում էր արծաթե մեդալի հարցը: Սակայն մրցակիցը ֆուտբոլ խաղալու փոխարեն որոշել էր «ստալինգրադյան ճակատամարտ» տալ մեր տղաներին: Խաղադաշտում իսկական կոպտություն էր տիրում, մրցակիցը մրցավարների բացահայտ թողտվությամբ անընդհատ սահանկումների ու մինի ֆուտբոլում արգելված այլ հնարքների էր դիմում՝ ցուցադրելով, թե ինչպես չի կարելի ֆուտբոլ խաղալ: Ավելին, նրանք, փոխանակ կանխեին վոլգոգրադցիներին, հերթական կոպտությունը չնկատելու տված մրցավարի հետ բանավեճի բռնված հայ ֆուտբոլիստին կարմիր քարտ ցույց տրվեց: Ինչեւէ, 3:0 հաշվով հաղթեց Վոլգոգրադի թիմը: Մրցաշարի հաղթող դարձավ Օդեսայի առաջին հավաքականը: Վոլգոգրադը ճանաչվեց երկրորդ մրցանակակիր, իսկ Երեւանը գրավեց երրորդ տեղը: Հայաստանի թիմին Օդեսայում միացել էին տեղացի նախկին պրոֆեսիոնալ ֆուտբոլիստներ, մեր հայրենակիցներ Ալեքսանդր Յագանցյանը եւ Վաղարշակ Մուրադյանը: Իսկ ընդհանրապես, մեր թիմին տեղում ծագած բազմաթիվ խնդիրները լուծելու հարցում անգնահատելի աջակցություն ցույց տվեց Օդեսայի հայկական համայնքի ներկայացուցիչ, գործարար Տիգրան Չատինյանը: ՏԻԳՐԱՆ ՀՈՎՀԱՆՆԻՍՅԱՆ«Տիգրանպրեսի» գլխավոր խմբագիր, Հայաստանի թիմի ավագ