ՀԱՆՐԱՔՎԵՆ
ՏԱՊԱԼՎԵԼՈ՞Ւ Է «Բարձրագույն մաթեմատիկայի մասին են խոսում՝
թվաբանությունից կաղալով»,- սահմանադրական փոփոխությունների գործընթացը այսպես բնութագրեց
ԱԺ պատգամավոր Շավարշ Քոչարյանը: Ըստ նրա, 2003թ. սահմանադրական հանրաքվեի տապալմամբ
ակնառու դարձավ՝ ինչպես չպետք է իրականացնել սահմանադրական փոփոխությունները: Պատգամավորի
կանխատեսմամբ՝ սահմանադրական առաջիկա հանրաքվեն եւս տապալվելու է, ավելի ստույգ.
«Իշխանությունները միտումնավոր այն տանում են տապալման»: Պրն Քոչարյանը համոզված
է, որ առանց 3 հիմնական հարցերի սահմանադրական փոփոխությունների անցկացումն անիմաստ
է. «Կառավարությունը պետք է նշանակվի եւ պաշտոնանկ արվի միայն ԱԺ մեծամասնության
կողմից, դատարանները պետք է անկախ լինեն գործադիր իշխանությունից, իսկ Երեւանի քաղաքապետը
պետք է լինի ընտրովի»,- բացատրեց պատգամավորը: ՀՌԱՀ հանձնաժողովի ձեւավորման մասին.
«Բազմիցս ասվել է. գիտեք ինչ, ցավոք մեզանում նշանակումները կատարում է նախագահը,
քանի որ Սահմանադրությունը այլ հնարավորություններ չի տալիս: Էհ, հիմա Սահմանադրությունը
բարեփոխում եք, տվեք այդ հնարավորությունը: Ոչ 2003-ին, ոչ էլ հիմա այդ հնարավորությունը
չի տրվում»,- դժգոհություն հայտնեց Շ. Քոչարյանը: ԵԽԽՎ-ում հայաստանյան պատվիրակության
անդամը տպավորություն ունի, որ ԵԽ-ն հոգնել է մեզանից, ինչպես մնացած այն երկրներից,
որոնք ձեւ են անում, «թե եվրոինտեգրվում են, բայց իրականում գնում են այլ ճանապարհով»:
Որպես այդպիսի երկրներ, ՀՀ-ից բացի, նշվեցին նաեւ ՌԴ-ն ու Ադրբեջանը: Թեեւ ՀՀ սահմանադրական
բարեփոխումների հարցը ԵԽԽՎ գարնանային նստաշրջանում չընդգրկվեց, այնուհանդերձ ԵԽ-ն,
ըստ նրա, շարունակում է հետաքրքրվել այս հարցով: ԵԽ բյուրոն որոշել է դիտորդներ ուղարկել
Հայաստան՝ սահմանադրական հանրաքվեին ներկա լինելու համար: Ի դեպ, սա բացառիկ երեւույթ
է, քանի որ ԵԽ-ն սովորաբար դիտորդներ ուղարկում է ընտրություններին, ոչ թե հանրաքվեին
հետեւելու համար: Մ. Ե.
