Տույժից խուսափել չկա «Ես պրինցիպիալ դեմ եմ պայմանագրով մեզ տույժի ենթարկելու գաղափարին, չկա դրա իրավական հիմքը: Կա Քաղօրի համապատասխան դրույթը, որով բաժանորդը կարող է մեզանից վնասի փոխհատուցում պահանջել, եթե ապացուցի, որ իրեն վնաս ենք հասցրել, էլ ինչո՞ւ են լրացուցիչ բեռ դնում մեզ վրա: Հիմա ինչ է, եթե բնակիչը տասը ամիս չվճարի՝ գազը չանջատե՞մ»,- Հանրային ծառայությունները կարգավորող հանձնաժողովի կայացրած որոշումից երեկ դժգոհեց «ՀայՌուսգազարդի» գործադիր տնօրեն Կարեն Կարապետյանը: Իսկ նրա տեղակալ Աշոտ Հովսեփյանը քննարկման ժամանակ ասաց. «Ի՞նչ տույժ, հիմա անգամ օբյեկտիվ պատճառով անջատելու դեպքում մենք պիտի արդարանա՞նք բաժանորդի առջեւ: Չէ՞ որ գազից զրկելը մեր շահերից չի բխում, դուք պայմանները սխալ եք դնում»: Սակայն հանձնաժողովի որոշման վրա նրանց բողոքը չանդրադարձավ՝ վճարած, բայց ապօրինի գազազրկված բնակիչը, արդեն պայմանագրով՝ պետք է ստանա չմատակարարված գազի արժեքը: Այն որոշվում է նախորդ ամսում մատակարարված գազի միջին ծախսի, չմատակարարված ժամանակահատվածի եւ գազի սակագնի արտադրյալով: Սակայն տույժը վճարվում է այն բաժանորդներին միայն, ովքեր նախորդ 6 ամիսներին եղել են բարեխիղճ վճարողներ: Երեկ հանձնաժողովի որոշմամբ հաստատվեց կենցաղային կարիքների համար բնական գազի մատակարարման նոր պայմանագիրը, ըստ որի՝ ներտնային սպասարկման ու անվտանգության պահպանման խնդիրը դրվեց «ՀայՌուսգազարդի» վրա: Ըստ այդմ, ընկերությունը պարտավորվում է տարին երկու անգամ՝ պարտադիր, ինչպես նաեւ՝ բնակիչների ահազանգով, զննել-մաքրել ծխատարները, հետեւել գազասարքերի շահագործման անվտանգությանը, ինչից ընկերության ներկայացուցիչները չդժգոհեցին: Նրանք միայն առաջարկեցին ոչ թե 3՝ ինչպես որոշման նախագծում էր սահմանված, այլ 6 ամսվա ընթացքում ավարտել պայմանագրերի թարմացումը, ինչն ընդունվեց: Հանձնաժողովի ներկայացրած երկրորդ հարցը ներտնային համակարգի նախագծման ու «գազ քաշելու» ծախսերի հաշվարկման մեթոդիկան էր, որն առանձնապես բուռն քննարկման չարժանացավ: Ըստ այդմ, գազիֆիկացումը պետք է կազմի 20-40 հազար դրամ՝ կախված բնակարանի դիրքից, խողովակների ծախսից եւ այլն: Իսկ «ՀայՌուսգազարդի» շահույթը հաշվարկվել է 10 տոկոս՝ կատարած աշխատանքների ընդհանուր գումարից: Գազիֆիկացման պատասխանատուն «ՀայՌուսգազարդն» է, թեպետ կարող է աշխատանքը պատվիրել այլ ընկերությունների: «Որոշումները հետագայում կարող են եւ փոփոխվել, թեպետ միեւնույն է, մեր ցանկացած որոշում հավասար դժգոհություն է առաջացնում երկու կողմերի միջեւ»,- եզրակացրեց հանձնաժողովի նախագահ Ռոբերտ Նազարյանը: Ռ. Ա.