Փողը մեծ դեր է խաղում մեր կյանքում: Այն թույլ է տալիս ձեռք բերել կարեւոր կենսական իրեր եւ զվարճանալ: Բայց պարզվում է, որ փողը կարող է ազդել մարդու պահվածքի եւ շրջապատի հետ նրա փոխհարաբերությունների վրա: Ամերիկացի գիտնականների վերջերս կատարած ուսումնասիրությունները ցույց են տվել, որ եթե մարդն իր աշխատանքը պայմանավորում է փող վաստակելով, ապա նրա աշխատունակությունը մեծանում է, իսկ աշխատավայրում կոլեգաների հետ փոխհարաբերությունները՝ վատանում:
Գիտնականները հայտնաբերել են, որ երբ մարդը աշխատանքի համար սպասում է դրամական պարգեւի, ավելի քիչ է հակված օգնելու իր կոլեգաներին եւ գերադասում է աշխատել միայնակ, ինչպես նաեւ հազվադեպ է օգնության համար դիմում ուրիշին: Մյուս կողմից էլ, մարդը, որ իր գործունեությունը պայմանավորում է գումար վաստակելով, ձգտում է ավելի շատ աշխատել եւ չի խուսափում դժվար հանձնարարություններից:
Ելնելով դրանից՝ գիտնականները եզրակացնում են, որ դրամական պարգեւատրումը համարվում է մարդու աշխատունակությունը բարձրացնելու լավագույն միջոց:
