ՖՈՏՈՄԵՂԱԴՐԱՆՔ -1
Հետո կասեք՝ խնձորը լվա, նոր կեր
![\"\"](\"https://www.aravot.am/2009/aravot_arm/April/1/p8.jpg\")
Օրեր առաջ Մալաթիայի շուկայում ականատես եղանք, թե ինչպես է վաճառակետերից մեկում մոտ հինգ կիլոգրամ սուրճը թափվել գետնին: Իրեն չկորցրած «բիզնեսմենը» կողքին հայտնված տատիկի օգնությամբ հավաքում էր այն, իսկ այդ պահին մեր անհարկի հարցին՝ «հետո դա վաճառելո՞ւ եք», բնականաբար, նա գերադասեց չպատասխանել:
Մ. Մ.
ՖՈՏՈՄԵՂԱԴՐԱՆՔ -2
Դրոշի ներքո
![\"\"](\"https://www.aravot.am/2009/aravot_arm/April/1/p3.jpg\")
Երեւանի կենտրոնում՝ Սարյան փողոցին հարող այս հատվածում երեկ նկատեցինք, որ շինարարություն է կատարվում Խորհրդային Հայաստանի դրոշի ներքո: Կարծեցինք՝ ապրիլմեկյան կատակ է, բայց պարզվեց, որ դրոշն այնտեղ է մի քանի ամիս: Խորհրդային կարգերը չվերադառնա՞ն:
Լ. Ս.
ՖՈՏՈՄԵՂԱԴՐԱՆՔ -3
Ավտոկանգառ՝ մայթի վրա
![\"\"](\"https://www.aravot.am/2009/aravot_arm/April/1/p7.jpg\")
Սա Արշակունյաց 2 հասցեում գտնվող տպարանի շենքն է: Բացի «Տիգրան Մեծից», շենքի 1-ին հարկում գտնվում են խանութներ եւ այլ բազմապիսի «օբյեկտներ»: Եվ այդ բոլոր հիմնարկներ այցելող մեքենաների տերերն իրենց սուրբ պարտքն են համարում ամեն օր ավտոկանգառ կազմակերպել մայթի վրա: Բացի այն, որ հետիոտնը ստիպված է մանեւրել իրեն տրամադրված տարածքում, մեքենաների ղեկին նստածները սարսափելի զայրանում են, երբ խանգարում ես նրանց սրընթաց ճանապարհը: Իսկ Արշակունյաց պողոտան, ի դեպ, Երեւան քաղաքի ամենաերկար փողոցն է, եւ Թումանյանի ու Սպենդիարյանի «տակը» փորելու փոխարեն կարելի էր գոնե վերգետնյա կանգառի մասին մտածել:
Մ. Մ.
