Միլանում շարունակվող սիրողական բռնցքամարտի աշխարհի առաջնությունում Հայաստանի ազգային հավաքականի ինն անդամներից պայքարը շարունակում են երեքը: Նրանք գոնե բրոնզե մեդալ նվաճելու համար դեռ պետք է երկուական հաղթանակ տանեն:
Երեկ ուշ երեկոյան 48 կգ քաշային Հովհաննես Դանիելյանը հերթական մենամարտը պետք է անցկացներ Հարավաֆրիկյան Հանրապետության ներկայացուցիչ Լեբոգանգ Պիլանի հետ, իսկ այսօր ռինգ մտնելու են մեր մյուս ներկայացուցիչները: Ազատ Հովհաննիսյանը 57 կգ քաշային կարգում ուժերը չափելու է տանտերերերից Ալեսիո Դի Սավինոյի հետ, իսկ աշխարհի գավաթակիր Անդրանիկ Հակոբյանի մրցակիցը լինելու է իռլանդացի Դարեն Օ, Նեյլը:
Անդրադառնալով մեր ընտրանու մյուս անդամների մրցելույթներին՝ նշենք, որ նրանցից երկուսի արագ պարտությունը, անկասկած, անակնկալ էր անգամ հավաքականի մարզիչների համար: Պեկինի օլիմպիական խաղերի բրոնզե մեդալակիր Հրաչիկ Ջավախյանը երկրորդ մենամարտում պարտություն կրեց միավորների 0:3 տարբերությամբ, իսկ 91 կգ քաշային, Եվրոպայի առաջնության արծաթե մեդալակիր Ցոլակ Անանիկյանը հենց մեկնարկից հետո վերածվեց հանդիսականի: Հիմա դահլիճում նրանց կողքին նստում են նաեւ Դերենիկ Գիժլարյանը՝ 51 կգ, Էդուարդ Համբարձումյանը՝ 64 կգ, Գառնիկ Հարությունյանը՝ 54 կգ եւ Սամվել Մաթեւոսյանը՝ 69 կգ:
