Բիլբաոյում մեկնարկած շախմատի «Grand Slam Masters Bilbao, 2009» մրցաշարի երկրորդ տուրում գրոսմայստեր Լեւոն Արոնյանը պարտության մատնեց առայժմ Ուկրաինայի մարզական դրոշի ներքո հանդես եկող Սերգեյ Կարյակինին եւ վաստակած միավորներով բարձրացավ երկրորդ հորիզոնական: Երկրորդ անընդմեջ հաղթանակը տոնեց ռուսաստանցի Ալեքսանդր Գրիշչուկը: Նրան անձնատուր եղավ Ալեքսեյ Շիրովը (Իսպանիա):
Երկու տուրից հետո միանձնյա առաջատարը Գրիշչուկն է՝ 6,0 միավոր: Արոնյանը երեք միավորով ընթանում է մաքուր երկրորդ տեղում, իսկ Կարյակինն ու Շիրովը իրենց անվան դիմաց գրանցել են 1,0-ական միավոր:
Երեկ երկու առաջատարները սեւերով խաղալու էին, համապատասխանաբար, Կարյակինի եւ Շիրովի հետ:
