ՀՀ տարածքային կառավարման նախարարությունը, ՀՀ Սյունիքի մարզպետարանը եւ Շվեյցարիայի զարգացման ու համագործակցության գործակալությունը երեկ ստորագրել են համաձայնագիր՝ Սյունիքի մարզի Սիսիանի եւ Գորիսի շրջանների ավելի քան 34 գյուղական համայնքներում նպաստել անասնապահության զարգացմանը, ֆերմերների եկամուտների աճի հնարավորությունների մեծացմանը եւ կայուն գործարար միջավայրի ստեղծմանը: Ծրագրերի ընդհանուր բյուջեն երեք տարիների համար 5 միլիոն շվեյցարական ֆրանկ է:
Շվեյցարական կողմից փաստաթուղթը ստորագրել է Հայաստանում եւ Վրաստանում Շվեյցարիայի Համադաշնության դեսպան Լորենցո Ամբերգը, ում հետ երկու օր առաջ կայացած հանդիպման ժամանակ ՀՀ տարածքային կառավարման նախարար Արմեն Գեւորգյանը պայմանավորվել էր Գորիսում փախստականների համար «Գորիս 1», «Գորիս 2» բազմաբնակարան սոցիալական տներ կառուցել:
